स्वास्थ्यमा कायापलट गर्ने उपेन्द्रको यस्तो ‘प्लान’

उपप्रधानमन्त्री एवं स्वास्थ्यमन्त्री उपेन्द्र यादवले सरकारले साना ठूला गरेर १२ सय वटा अस्पतालको डिजाइन गरिरहेको बताएका छन् ।

उनले नयाँ स्वास्थ्य नीति योजनामा अस्पताल निर्माण योजना प्राथमिकतामा रहेको बताए । ‘न्यु हेल्थ पोलिसी, न्यु हेल्थ प्लान आउँदैछ । त्यसैगरी नयाँ अस्पतालहरु बनाउने योजना छ’, उनले भने ‘सोही क्रममा साना ठूला गरी देशभर १२ सय वटा अस्पतालको डिजाइनिङ हुँदैछ । ‘

मंगलबार नारायणी उपक्षेत्रीय अस्पताल वीरगञ्जको निरीक्षण गर्न आएका उपप्रधानमन्त्री यादवले नारायणी उपक्षेत्रीय अस्पताललाई प्रदेश २ कै नेतृत्वदायी अस्पताल बनाउने उद्घोष गरे ।

‘नेपालको सबभन्दा पुरानो अस्पतालमध्ये एउटा अस्पताल नारायणी अस्पताल हो । जुन बेला यो अस्पताल बनेको थियो । त्यो बेलामा यो यस क्षेत्रकै सबैभन्दा राम्रो अस्पताल, ठूलो अस्पताल यही थियो’, उनले भने, ‘तर अस्पतालको साइज त्यही रहृयो तर पपुलेसनको साइज बढ्दै बढ्दै गयो । आवश्यकताहरु बढ्दै गयो । यसलाई निर्माण गर्ने अलि आधुनिकीकरण गर्ने, स्तरोन्नती गर्ने कार्यमा कसैको ध्यान गएन ।’

नेपाल संघीय समाजवादी पार्टीका अध्यक्षसमेत रहेका उपप्रधानमन्त्री यादवले अस्पतालमा नयाँ पूर्वाधार नआउन्जेल भएकै पूर्वाधारहरु उपयोग गरेर स्तरीय सेवा दिन चिकित्सकहरुलाई आग्रह गरे । ‘यहाँको आवश्यकता पूरा गर्नु छ, त्यो ठूलो चुनौतीको काम हो । लार्ज पपुलेसन, सीमित स्रोत, सीमित इक्युपमेन्ट, डाक्टर चिकित्सकको अभावमा यहाँहरुले जुन स्वास्थ्य सेवा दिइराख्नुभएको छ । त्यो प्रशंसनीय छ’ उनले भने ।