तरुण दल अगुवा भेलाको तयारी तिव्र

भैरहवा : यही आईतवार र सोमवार भैरहवामा हुने नेपाल तरुण दलले अगुवा तरुण नेताहरुको प्रशिक्षण भेलाको तयारी तिव्र पारीएको छ । नेपाल तरुण दलको गत फागुनमा काठमाण्डौमा भएको जिल्ला अध्यक्षहरुको भेलाले तरुणहरुलाई प्रशिक्षण गर्न दिएको सुझावका आधारमा केन्द्रीय समितिले सातै प्रदेशमा प्रशिक्षणको कार्यक्रम तय गरेको थियो ।

सोही कार्यक्रम अन्तरगत पाँच नम्बर प्रदेशका तरुण दलका अगुवा नेताहरुलाई प्रशिक्षण गर्न लागिएको तरुण दल रुपन्देहीका अध्यक्ष सोम बहादुर गुरुङ्ग (सेते) ले जानकारी दिए ।

बैसाख ९ र १० गते रुपन्देहीको भैरहवा स्थित नेपाली काँग्रेसको पार्टी कार्यालयमा हुने प्रशिक्षण कार्यक्रममा प्रदेश पाँचका १२ जिल्लाबाट जिल्ला समितिका पदाधिकारी, क्षेत्रीय अध्यक्ष, नगर अध्यक्ष, गाउँपालिका अध्यक्ष तथा केन्द्रीय पार्षद गरि २ सय जना सहभागि हुने तरुण दल रुपन्देहीका सचिव रमेश शाहीले जानकारी दिए ।

उक्त प्रशिक्षण कार्यक्रममा नेपाली काँग्रेस केन्द्रीय सदस्य तथा नेपाल तरुण दलका पूर्व अध्यक्ष बालकृष्ण खाँण, पार्टी केन्द्रीय सदस्य प्रकाशशरण महत, नेता गोविन्द भट्टराई लगायतका नेताले प्रशिक्षण दिने छन् । उक्त प्रशिक्षणकालागि जिल्लामा तयारीका काम अन्तीम चरणमा पुगेको सचिव शाहीले बताए ।