नेपाल बन्द गर्नेहरूलाई निस्तेज पार्न गृहको निर्देशन
काठमाडौँ- फागुन ४ गते (भोलि) आह्वान गरिएको बन्दविरुद्ध सरकार सशक्त रूपमा उत्रने भएको छ । गृह मन्त्रालयले विभिन्न ६ दलले एमसीसीको विरोधमा बन्दको आह्वान गरेपछि उक्त बन्द निस्तेज पार्न आदेश दिएको छ ।
गृह मन्त्रालयले बन्दविरुद्ध शान्ति सुरक्षा कायम गर्न मातहतका निकायलाई सर्कुलर गरेको छ । सर्कुलरमा उच्च सतर्कता र निगरानी बढाएर बन्द निस्तेज पार्ने भनिएको छ ।
मन्त्रालय अन्तरगतको शान्ति सुरक्षा तथा अपराध नियन्त्रण शाखाले नेपाल प्रहरी, सशस्त्र प्रहरी र राष्ट्रिय अनुसन्धान विभागलाई सबै जिल्लाको समग्र शान्ति सुरक्षा र सुव्यवस्थालाई चुस्त दुरुस्त बनाउन निर्देशन दिएको हो।
‘प्रस्तुत विषयमा नेपाल कम्युनिष्ट पार्टी लगायतका ६ वटा राजनीतिक दलले आज फागुन ३ गते साँझ मसाल जुलुस प्रदर्शन गर्ने र फागुन ४ गते नेपाल बन्दको आह्वान गरेको भनी सूचना प्राप्त भएकोले सो सन्दर्भमा कानुन विपरीतका उल्लेखित गतिविधिहरू हुन नदिन सम्पूर्ण सुरक्षा संयन्त्रले उच्च सतर्कता र निगरानी बढाई जिल्लाको समग्र शान्ति सुरक्षा र सुव्यवस्थालाई चुस्त दुरुस्त बनाउनुहुन आदेशानुसार अनुरोध छ’, मन्त्रालयको सर्कुलरमा भनिएको छ ।
