माओवादी तेस्रो भएपछि नारायणकाजीले गरे नेतामाथि यस्तो व्यंग्य
नेकपा माओवादी केन्द्रका वरिष्ठ नेता नारायणकाजी श्रेष्ठले पार्टी स्थानीय निर्वाचनमा तेस्रो भएपछि सामाजिक संजालमा माओवादी नेताहरूलाई नै व्यंग्य गरेका छन् ।
उनले पद, शक्ति र अहं त्यागेमात्र पार्टी निर्माण हुने भन्दै माओवादी नेताहरू पदलोलुप भएकोले शक्ति र अहं त्याग्नुपर्ने बताएका छन् ।
स्थानीय तहको निर्वाचन मतपरिणाम अन्तिम चरणमा पुगेको बेला श्रेष्ठले सरकार र पदमात्र सोचाई त्याग्न आग्रह गरे।
‘चुनावदेखि चुनावसम्म, पददेखि पदसम्म र सरकारदेखि सरकारसम्म मात्र सिमित हुँदै गए,’ श्रेष्ठले शुक्रबार दिउँसो लेखेका छन्, ‘देश, जनता, श्रमिक एवं उत्पीडित वर्ग, समुदाय, आदर्श, सिद्धान्त, मुल्य मान्यता, लक्ष्य र उदेश्यको विसर्जनको विन्दुमा पुग्यौं भने कम्युनिष्ट वा क्रान्तिकारी समाजवादी भनिरहनुको कुनै अर्थ हुनेछैन।’
‘पद, शक्ति र अहंलाई मार्गदर्शक बनाउन र त्यसको लागि जे सुकै गर्न र सोच्न छाडौं,’ श्रेष्ठले लेखेका छन्।
स्थानीय तहमा माओवादी केन्द्रले १ सय १३ पालिका जितेको छ। यस्तै, ११ तहमा अग्रता लिएर तेस्रो स्थानमा छ।
गोरखा जिल्लाका ११ पालिकामध्ये ९ पालिका जितेपछि वरिष्ठ नेता श्रेष्ठले माओवादीभित्र पद र पद शक्ति खोज्ने प्रवृत्तिको व्यंग्य गरेका हुन्।