शशांकको युटर्न: शेखरलाई सभापतिमा समर्थन गर्ने, आफू नलड्ने

काठमाडौं । नेपाली कांग्रेसका महामन्त्री डा. शशांक कोइरालाले एकाएक युटर्न लिएका छन् । उनको उटर्नले सभापती देउवाइतर समूह सशंकित बनेको छ ।

सभापतिका आकांक्षीमध्ये दाजु शेखरलाई साथ दिने संकेत गरेका छन् । यसले कांग्रेस, त्यसमा पनि संस्थापन इतर समूह निकै तरंगित भएको छ ।

कांग्रेसको १४ औं महाधिवेशन मंसिर २४ देखि २६ गतेसम्म काठमाडौंमा हुने तय भएको छ । संस्थापन समूहबाट सभापति शेरबहादुर देउवा उम्मेदवारको आकांक्षी छन् भने उपसभापति विमलेन्द्र निधिले पनि सभापति उठ्ने दाबी गरेका छन् ।

संस्थापन इतर समूहबाट वरिष्ठ नेता रामचन्द्र पौडेल, महामन्त्री कोइराला, पूर्वमहामन्त्री प्रकाशमान सिंह, पूर्व महामन्त्री कृष्णप्रसाद सिटौला र केन्द्रीय सदस्य डा. शेखर कोइराला आकांक्षी छन् । सिटौलाले आफू तेस्रो धार भएको बताउँदै आएका छन् भने चार जना पौडेल समूहमा छन् । साझा उम्मेदवार तय गर्ने बताएको पौडेल समूहका नेताहरुबीच पछिल्लो समय सम्वाद नै हुन छाडेको छ ।

त्यही बेला सभापतिका आकांक्षीमध्ये एक महामन्त्री डा. कोइरालाले डा. शेखरलाई समर्थन गर्ने संकेत गरेका छन् । बुधबार उनको एउटा भिडियो सार्वजनिक भएको छ, जुन सोमबार सर्लाहीमा पार्टी कार्यकर्तासँग भएको भेटको हो ।

रौतहटबाट फर्किने क्रममा सर्लाहीमा कार्यकर्तालाई भेटेका डा. कोइरालाले संस्थापन इतर समूहबाट सभापतिको आकांक्षी रहेका नेताहरुबारे टिप्पणी गर्दै भनेका थिए,

रामचन्द्रजी एक पटक लडिसक्नुभयो । सिटौलाजीलाई पनि हामीले तान्नुपर्छ । उहाँसँग पनि धेरै मान्छेको आकर्षण छ । किनभने सिटौलाजीसँग धेरै मान्छेको आशा छ । उहाँलाई तानेर एउटै मात्र उम्मेदवार बनायौं भने शेरबहादुर देउवा हार्नुहुन्छ ।

अर्को प्रकाशमान । भन्दाखेरि मलाई नराम्रो लाग्छ, तर सत्य हो । उहाँ काठमाडौंमै घेरिएर बस्नुभएको छ । बाहिर निस्केपछि प्रकाशमान सिंहलाई चिन्दैनन् मान्छेहरुले । हुन त उहाँ महामन्त्री हुनुभयो, त्यो अलग पाटो हो । तर उहाँमा जुन आत्मीयता छ साथीहरुसँग, त्यो म देख्दिनँ ।

चौथो हो, शेखर दाइ । शेखर दाइ पनि लागिराख्नुभएको छ, भिडिरहनुभएको छ । मैले भनिहालेँ, हामी मिलेर जानुपर्छ भन्ने तपाईंहरुको भावना हो, त्यसलाई म कदर गर्छु र, सम्मान गर्छु । शेखर दाइसँग कुरा हुन सकेको छैन । म जानेवित्तिकै उहाँसँग कुरा राख्छु । उहाँलाई सभापति हुन मन छ भने अरुलाई पनि कन्भिन्स गर्न सक्नुपर्‍यो, मलाई त गरिहाल्नुहुन्छ । (कार्यकर्तासँगै उनी पनि हाँस्दै) मैले भनेको म बाधक हुदिँन । बरु सबै मिलाउने काममा लाग्छु ।

सोमबार काठमाडौं आएका महामन्त्री कोइरालाले त्यही दिन पूर्वमहामन्त्री कृष्ण सिटौलालाई भेटेका छन् । भोलिपल्ट संस्थापन इतर समूहका युवा नेताहरुलाई भेटे, जो सभापतिका आकांक्षीहरुलाई सम्वादमा बस्न दबाव दिँदै आएका थिए ।

एक नेताका अनुसार त्यो भेटमा महामन्त्री कोइरालाले सर्लाहीमा जस्तो शेखरलाई समर्थन गर्ने संकेत त गरेनन्, तर सबै नेताहरुसँग सम्वाद गर्ने आश्वासन दिए । कृष्ण सिटौलासँग कुराकानी भइरहेको बताएका उनले रामचन्द्र पौडेल, प्रकाशमान सिंहलगायतलाई पनि भेटेर छलफल गर्ने बताएका थिए ।

मंगलबार साँझ नै महामन्त्री कोइराला दाजु शेखर कहाँ पुगे । शेखर निकट स्रोतका अनुसार त्यो भेटमा महामन्त्री कोइरालाले सभापतिमा शेखरलाई समर्थन गर्ने वचन दिए । ‘उहाँ (शशांक) ले भोलि नै पत्रकार सम्मेलन गरौं, हाम्रो तर्फबाट (सभापतिको उम्मेदवार) तपाईं नै हो भनौं भन्ने उहाँकै प्रस्ताव हो,’ स्रोतले भन्यो, ‘शेखर कोइरालाले मंसिर ३ गते प्रदेशसभा निर्वाचन क्षेत्रको चुनाव सकिन्छ, ४ गते गरौं भन्नुभयो ।’ त्यसपछि कोइराला दाजुभाइ छुट्टिए ।

रातभरमा डा. शेखरको मुड बदलियो । तत्काल पत्रकार सम्मेलन गरेर कोइराला परिवारको तर्फबाट आफू सभापतिको उम्मेदवार घोषणा गर्नुपर्ने निश्कर्षमा पुगे । विहानै डा. शशांक कहाँ पुगे र १० बजे पत्रकार सम्मेलन गर्ने प्रस्ताव राखे ।

‘उहाँहरुबीच सहमति भएपछि पत्रकारहरुलाई खबर गर्नु भनेर फर्किनुभयो,’ शेखर निकट स्रोतको दाबी छ, ‘तर एकाएक चलखेल गरेर त्यसलाई भाँड्ने काम भयो ।’ शशांक निकटवर्तीहरुले सहमति भाँडेको उनीहरुको आरोप छ । प्रधानमन्त्रीले बोलाउनुभएको छ भन्दै निवासबाट निस्किएका महामन्त्री कोइराला एकाएक संखुवासभा पुग्नुले पनि त्यसलाई बल दिएको उनीहरु बताउँछन् ।

शशांक निकटवर्तीहरु भने डा. शेखरले छापामार शैलीमा पत्रकार सम्मेलन गरेर भाइको समर्थन लिन खोजेपछि महामन्त्री आफैंले छलेको दाबी गर्छन् ।