सबै विद्यालयमा एउटै ड्रेस अनिवार्य
सबै विद्यालयमा एउटै पोसाक भन्ने सुन्दा अचम्म लाग्ला तर, विद्यार्थीबीच बढेको असमानता मध्यनजर गरेर मकवानपुरको मनहरी गाउँपालिकाले सबै विद्यालयमा एउटै पोसाक लागू गर्ने भएको छ । नयाँ शैक्षिक सत्रका लागि अभिभावकले विद्यालय पोसाक खरिद गर्ने बेला गाउँपालिकाले यस्तो निर्णय लिएको हो । मनहरी गाउँपालिकाका ३२ वटा स्कुलमा करिब ६ हजार विद्यार्थी एउटै पोसाकमा विद्यालय जानेछन् ।
‘मनहरी गाउँपालिकाभित्र रहेका सबै सामुदायिक विद्यालयमा अध्ययनरत विद्यार्थीले एकैखालको पोसाक लगाउनुपर्ने गरी नियम बनाएका छौं,’ मनहरी गाउँपालिका उपप्रमुख मनिला विष्टले भनिन् ।
गाउँशिक्षा समिति मनहरीले विद्यार्थीको पोसाकमा विविधता देखिएको भन्दै एकरूपता ल्याउन यस्तो निर्णय गरेको हो । निर्णयअनुसार पोसाकअन्तर्गत अकासे रङको सर्ट, गाढा नीलो रङको पाइन्ट, टाई र जुत्ता रहने उल्लेख छ ।
त्यस्तै, वर्षा याममा भने कतिपय विद्यालयमा टाई र जुत्ता अनिवार्य नहुने समितिले निर्णय गरेको छ ।
‘पोसाक देखेर मनहरी गाउँपालिकाका विद्यालयको विद्यार्थी रहेछ भनेर सबैले चिनून् भन्ने उद्देश्य पनि हो,’ मनहरी गाउँपालिका उपप्रमुख विष्टले भनिन् ।
गाउँशिक्षा समितिले शैक्षिक वर्ष २०७६ का लागि शैक्षिक पात्रोसमेत निर्माण गरेको छ । पात्रोमा दसैं, तिहार र छठ पर्वलाई जोडेर दिइँदै आएको लामो बिदा कटौती भएको छ । दसैं र तिहारबीचमा १३ दिन विद्यालय सञ्चालन हुने गरी शैक्षिक पात्रो निर्माण भएको गाउँशिक्षा प्रमुख राजेन्द्र चौलागाईंले बताए ।
गाउँपालिकामा रहेका संस्थागत विद्यायको पोसाकमा पनि एकरूपता कायम गर्न निजी तथा आवासीय विद्यालय (प्याब्सन)सँग सहकार्य गरिने चौलागाईंले बताए ।
पोसाकबाट सुरु भएको समानता विस्तारै गुणस्तरसम्म पुर्याउन बाटो खुला गरिएको चौलागाईंले बताए ।