संसद्मा हात हालाहाल,एक सांसद घाइते
एजेन्सी-सुपुर्दगी विधेयकका विषयलाई लिएर हङ्कङको संसद्मा हात हालाहाल भएको छ ।
मुख्यभूमि चीनसहित अन्य मुलुकमा पक्राउ पुर्जी जारी भएका मानिसलाई हङ्कङले सुपुर्दर्गी गर्नसक्ने कानून निर्माणका लागि ल्याइएको विधेयकका विषयमा भएको छलफल उग्र बनेपछि हात हालाहालको अवस्था आएको हो ।
हङ्कङका लोकतन्त्र समर्थक तथा चीन सरकार समर्थित दुई बेग्ला बेग्लै समूहले उक्त विधेयक माथिको सुनुवाई थालेपछि संसद्भित्रको अवस्था उग्र बनेको थियो ।
त्यसपछि सांसाद्हरु टेबलमाथि चढेर होहल्ला शुरु गरेका थिए । त्यसैबीचमा हात हालाहालको अवस्था आएको अन्तर्राष्ट्रिय सञ्चारमाध्यमले जनाएका छन् ।
हालत हालाहालका क्रममा एकजना लोकतन्त्रवादी सांसद् ग्यारी फान घाइते भएको र उनलाई उपचारका लागि अस्पताल भर्ना गरिएको छ ।
बन्न लागेको पछिल्लो कानूनअनुसार कुनै पनि मुलुकमा अपराधको अभियोग लागेका जो कोहीलाई पनि हङ्कङबाट सुपुर्दगी गर्न सकिनेछ ।
यस्तो कानून बनेमा हङ्कङमा, कम्युनिष्ट पार्टीको सरकार रहेको चीनको अनावश्यक प्रभाव बढ्ने र यसले व्यापारिक केन्द्रका रुपमा रहेको हङ्कको छविमा आँच आउने हङ्कङका लोकतन्त्रवादी तथा विपक्षी नेताहरुको तर्क छ । यसको विरोधमा हङ्कङमा केही महिनायता प्रदर्शन समेत हुँदै आएका छन् ।