रोनाल्डोको ७ नम्बर जर्सी मोड्रिचलाई दिन दवाव
म्याड्रिड (एजेन्सी)– विश्वकपको उत्कृष्ट प्रदर्शनपछि क्रोएसियाका मिडफिल्डर कप्तान लुका मोड्रिचलाई क्रिस्टियानो रोनाल्डोको चर्चित ७ नम्बर जर्सी दिन समर्थकहरूले रियल म्याड्रिड क्लबको व्यवस्थापकलाई चर्को दबाब दिएका छन्।
दुई साताअघि पोर्चुगलका स्टार स्ट्राइकर क्रिस्टियानो रोनाल्डो म्याड्रिड छोडेर १० करोड युरोमा इटाली क्लब युभेन्ट्स लागेका थिए।
रोनाल्डो क्लबबाट बाहिरिएपछि रिक्त रहेको उनको ७ नम्बर जर्सी मोड्रिचलाई उपलब्ध गराउन क्लबका समर्थकले दबाब दिएका हुन्।
मोड्रिचको उत्कृष्ट प्रदर्शनमा क्रोएसिया दुई साताअघि रुसमा सम्पन्न विश्वकपको फाइनल पुगेको थियो। मोड्रिच विश्वकपको उत्कृष्ट खेलाडी पनि घोषित भएका थिए।
रोनाल्डोको वर्हिगमनपछि उनका धेरै ‘फ्यान’ युभेन्ट्स क्लबतर्फ मोडिएका छन्। तर, म्याड्रिडलाई माया गर्ने ‘फ्यान’ रोनाल्डोको अनुपस्थितिमा मोड्रिचतर्फ मोडिएको स्थानीय स्पेनिस पत्रिका ‘एएस’ ले जनाएको छ।
पत्रिकाका अनुसार हालको केही दिनयता मोड्रिचको टिसर्टको माग बढेको छ। म्याड्रिडका थुप्रै ‘फ्यान’ ले मोड्रिचको जर्सी लाउन थालेका छन्। मोड्रिच सन् २०१२ देखि म्याड्रिडमा आवद्ध छन्। आउँदो अगष्टमा आयोजना हुने अन्तर्राष्ट्रिय च्याम्पियन्स कपमा म्याड्रिड ९ वर्षयता पहिलो पल्ट रोनाल्डो बिना खेल्दैछ।