रेणु दाहाल काण्ड काङ्ग्रेसको सबैभन्दा ठुलो गल्ती हो- गगन थापा

काठमाडौं -नेपाली काङ्ग्रेसका केन्द्रीय सदस्य गगनकुमार थापाले नेपाली काङ्ग्रेस वैचारिकरुपमा विचलित नभएको बताउनुभएको छ । उहाँले काङ्ग्रेसमा गुटउपगुट भए पनि वैचारिकरुपमा स्पष्ट भएको बताएका छन् ।

पार्टीले देशभर सञ्चालन गरेको जागरण अभियानअन्तर्गत आज बागलुङको तमानखोला गाउँपालिका–३ तमान गाउँमा आयोजित भेलालाई सम्बोधन गर्दै नेता थापाले हिजोका दिनमा काङ्ग्रेसले गरेका गल्ती अब नदोहोर्याउने प्रतिबद्धता व्यक्त गरे ।

उनले भरतपुरमा माओवादीलाई भोट हाल्नु काङ्ग्रेसको ठूलो गल्ती भएको स्वीकारेका छन् । “काङ्ग्रेस नीति र विचारमा स्पष्ट छ”, उनले भने, “अबका दिनमा काङ्ग्रेसको लोकप्रियता बढ्दै जानेछ ।” नेता थापाले अहिलेको सरकारले युवा लक्षित कार्यक्रम ल्याउन नसक्दा विदेश पलायन हुनेको सङ्ख्या बढ्दै गएको आरोप लगाए ।

उनले आजै नेपाल भुपू सैनिक सङ्घ बागलुङको ११औँ जिल्ला सम्मेलनलाई समेत सम्बोधन गर्नुभएको काङ्ग्रेसका जिल्ला सभापति दीपेन्द्रबहादुर थापाले जानकारी दिए । रासस