प्रचण्डले भने: लाजै पचाएपछि मानिस केपी ओली बन्दो रहेछ - Himal Post Himal Post
  • २० माघ २०८१, आईतवार
  •      Sun Feb 2 2025
Logo

प्रचण्डले भने: लाजै पचाएपछि मानिस केपी ओली बन्दो रहेछ



काठमाडौं । नेकपा माओवादी केन्द्रका अध्यक्ष पुष्पकमल दाहाल (प्रचण्ड)ले मान्छेमा लाज र सरम हराएपछि केपी ओली बन्ने बताएका छन् । उनैल लाजै पचाएर प्रधानमन्त्रीको कुर्चीमा बसेका केपी शर्मा ओलीलाई जसरी पनि हटाएरै छोड्ने बताए ।

उनले केपी ओलीलाई तीनपटकसम्म आफूहरुले हटाएको र अब चाँडै चौंथोपटक पनि हटाउने जिकिर गरेका छन् । आइतबार गृहजिल्ला पुगेको उनले चितवनमा पत्रकारहरुसँग कुरा गर्दै ओली नकचरो भएर प्रधानमन्त्रीको कुर्सीमा बसिरहेको आरोप लगाए ।

‘केपी ओलीलाई हामीले तीनपटक प्रधानमन्त्रीबाट हटायौं । एकपटक संसदीय दलमा बहुमतको हस्ताक्षर गरेर संसद सचिवालयमा दर्ता गर्‍यौं । दल नेताबाट ओलीलाई हटाएर मलाई सर्वसम्मत बनाइयो । संविधानअनुसार दल नेता नरहेपछि प्रम जान्छ नि । जानुपर्ने हो,’ प्रचण्डले भने ।

ओलीलाई पार्टीको केन्द्रीय समितिको ७० प्रतिशतले पार्टी सदस्यबाट समेत हटाउँदै प्रधानमन्त्रीबाट समेत हटाएको बताए ।

‘३० प्रतिशत सदस्यले दिएको मतले दिएको पदलाई प्रधानमन्त्री भनिराख्न मिल्दै मिल्दैनथ्यो । तर त्यही भयो । हाम्रो तर्फबाट त हामीले जितेकै हो,’ प्रचण्डले भने ।

ओलीले संसद विघटनको प्रस्ताव गरेपछि त्यसलाई असंवैधानिक र अलोकतान्त्रिक भन्दै जनता लाखौं सडकमा उतारेर प्रधानमन्त्रीबाट तेस्रो पटक हटाएको बताए ।

‘यसरी ओलीलाई तीनपटक त हामीले प्रधानमन्त्रीबाट हटायौं । अब चौथोपटक केही दिनभित्रै हटाउँछौं । हेरौं चौंथोपटक के हुन्छ,’ प्रचण्डले भने, ‘कांग्रेससँगको सहमतिमा कांग्रेसकै नेतृत्वमा सरकार बन्न सक्छ, यसपछि ओली प्रधानमन्त्रीबाट हट्छन् ।’

प्रचण्डको भाषण जस्ताको त्यस्तै

केपी ओलीलाई हामीले तीनपटक प्रधानमन्त्रीबाट हटायौं । एकपटक संसदीय दलमा बहुमतको हस्ताक्षर गरेर संसद सचिवालयमा दर्ता ग-यौं । दल नेताबाट ओलीलाई हटाएर मलाई सर्वसम्मत बनाइयो । दुई पार्टीको केन्द्रीय समितिको ७० प्रतिशतले केपीलाई पार्टी सदस्यबाट समेत हटाइयो ।

संविधानअनुसार दल नेता नरहेपछि प्रम जान्छ नि । जानुपर्ने हो । हामीले त हटाइदियौं । मैले राजनीतिक भाषा बोलेको होइन । कानूनी संवैधानिकरुपमा नै भनिरहेको छु । राष्ट्रविरोधि, लोकतन्त्रविरोधि, संविधानविरोधि काम गरेको तथा पार्टी अनुशासन पालन नगरेको कारणले उनलाई हटाइयो ।

संविधान–कानूनअनुसार बहुमतले हटायौं भनेर निर्वाचन आयोगमा आफैं उपस्थित भएर पनि भन्यौं । हामी यहाँ छौं भन्यौं । तर निर्वाचन आयोगले निर्णय गरेन, जो गर्नैपर्थ्यो। ७० प्रतिशतलाई मान्यता नदिएर ३० प्रतिशतलाई प्रधानमन्त्री भनिराख्न मिल्दै मिल्दैनथ्यो । तर त्यही भयो । हाम्रो तर्फबाट त हामीले जितेकै हो ।

तेस्रोपटक चाहिँ, उहाँले संसद विघटनको प्रस्ताव गर्नुभो । हामीले त्यसलाई असंवैधानिक र अलोकतान्त्रिक भन्यौं । अरु पार्टीले पनि भने । जनता लाखौं सडकमा उत्रे । अदालतले पनि जनताको त्यो देखिसकेपछि संसद विघटनकाविरुद्ध पुनस्थापनाको निर्णय लियो ।

यति ठूलो निर्णय प्रधानमन्त्रीले गरेको र त्यसलाई अदालतले उल्टाइदिएपछि तुरुन्तै प्रधानमन्त्रीबाट हटाउनुपर्थ्यो । दुनियाँको कोही मान्छे बसिराख्दैन यसरी लाज, घिन पचाएर । तर विडम्बना भन्नुपर्छ, अहिलेसम्म नकच्चरो भएर केपी प्रधानमन्त्री पदमा बसिरहेका छन् । तीनपटक त हामीले हटायौं । अब चौथोपटक केही दिनभित्रै हटाउँछौं । हेरौं चौंथोपटक के हुन्छ ? केही दिनभित्रै हुन सक्छ ।