पौडेलले भने : देउवालाई पार्टीले कारबाही गर्छ

गाईघाट । प्रमुख प्रतिपक्षी दल नेपाली कांग्रेसका वरिष्ठ नेता रामचन्द्र पौडेलले बालुवाटार जग्गा प्रकरणमा दोषी प्रमाणित भए पार्टीले सभापति शेरबहादुर देउवालाई कारबाही गर्ने बताएका छन् । नेपाल प्रेस यूनियन उदयपुरले शुक्रबार सदरमुकाम गाईघाटमा आयोजना गरेको पत्रकार सम्मेलनमा नेता पौडेलले जग्गा प्रकरणमा देउवा दोषी प्रमाणित भए कारबाही गरिने बताएका हुन् ।

पार्टीमा आवद्ध जुनसुकै तहका र जो सुकै नेता भए पनि भ्रष्टाचारमा मुछिएको थाहा पाए कडा कारबाही गरिने उनको भनाइ थियो । पार्टीको जागरण अभियान अन्तर्गत उदयपुर पुगेका नेता पौडेलले भने, ‘‘अहिले बालुवाटारको जग्गा काण्ड, एनसेल काण्ड र वाइड वडी काण्डमा विभिन्न पार्टीका नेताहरुको नाम जोडिएको छ । त्यसमा सभापति शेरबहादुरजीको पनि नाम जोडिएको छ । पुष्टि भए पार्टी सभापतिलाई पनि कांग्रेस कारबाही गर्न तयार छ ।’’

उनले कांग्रेस लामो इतिहास बोकेको पार्टी भएका कारण पार्टीभित्रका झिना–मसिना कुराले कुनै असर नपार्ने बताए । उनले सरकारले राम्रो काम गर्ने अवसर पाइरहेको भए पनि नेपाली जनताले सोचे जस्तो काम गर्न नसकेको जिकिर गरे । नेता पौडेलले सत्तापक्ष र विपक्षीबीच जारी वाक युद्धले प्रजातन्त्र र संघीयतालाई बलियो नबनाउने भन्दै दुबै पक्षले बोल्दा संयमित भएर संसदीय मर्यादामा रहेर बोल्न सिक्नुपर्ने सुझाव दिए ।