जितसँगै पर्सिजा शिर्षस्थानमा

सेमाराङ (एजेन्सी) – इन्डोनेसियन लिगा वोनमा पेर्सिजा जाकार्ताले पिएसआईएस सेमाराङलाई ४-१ ले पराजित गर्दै लिगको शिर्ष स्थानमा उक्लिएको छ। सेमाराङको घरेलु मैदानमा भएको खेलमा रोहित चन्दले पुरै ९० मिनेट खेले।

पहिलो हाफमा दुवै टोलीले गोल गर्न सकेनन्। पर्सिजाले जेमर्सनको ६९ औं मिनेटको गोलमा अग्रता लियो। जेमर्सनले ७३ औं मिनेटमा पुनः गोल गर्दै भ्रमणकारी पर्सिजाको अग्रता दोब्बर गरे। खेलको ८३ औं मिनेटमा २६ वर्षीय इन्डोनेसियन मिडफिल्डर रिको सिमानजुन्ताकले पर्सिजालाई तेस्रो गोल दिलाए। त्यस्तै पर्सिजाका भरपर्दा स्ट्राइकर मार्को सिमिकले इन्जुरी समयमा गोल गर्दै पर्सिजालाई ४-० को अग्रता दिलाए। घरेलु टोलीका अब्दु लेस्तालुहूले इन्जुरी समयमा सान्त्वना गोल गरे।

यो जितसँगै पर्सिजा अंक तालिकाको शिर्ष स्थानमा उक्लिएको छ। ५ खेलमा १० अंक सहित पर्सिजा शिर्ष स्थानमा छ भने दोस्रो स्थानको पर्सिपुरा जयपुराको ४ खेलमा ८ अंक छ। सेमाराङ भने ५ खेलमा ५ अंक सहित १४ औं स्थानमा छ।