ओलीले नामै नलिएका ४ केन्द्रीय सदस्य सर्वसम्मत

चितवन। एमाले अध्यक्ष केपी शर्मा ओलीले आफ्ना निकटवर्तीसँग सल्लाह गरेर जारी गरेको सूचीमा नपरेका ४ जना नेताहरु केन्द्रीय सदस्यमा निर्विरोध निर्वाचित भएका छन् । प्रदेशमा खुलातर्फ, महिलामा खुला तर्फलगायतका सदस्यहरू निर्विरोध भएका हुन्।

प्रदेश २ को खुलाबाट अरविन्द सिंह र सुमन प्याकुरेल, महिलाबाट रञ्जना सरकार निर्विरोध निर्वाचित भएका हुन् । त्यसै गरी, खुला महिलाबाट उषाकिरण तिमल्सेना पनि केन्द्रीय सदस्यमा निर्विरोध निर्वाचित भएकी हुन् ।

खुला महिलातर्फ ५४ जनाको उम्मेदवारी परेको थियो । अध्यक्ष ओलीले नाम घोषणा गरेका ५३ जना महिला नेताहरूसहित तिमल्सेनाले पनि उम्मेदवारी दर्ता गरेकी थिइन् । सो क्लष्टरमा निर्विरोध निर्वाचित गराउनका लागि अध्यक्ष ओलीले राखेको नामबाट अर्चना गहतराजले नाम फिर्ता लिएपछि तिमल्सेना निर्विरोध भएकी हुन् ।

त्यसैगरी, लेखा आयोगका उपाध्यक्षमा विष्णु पन्थी निर्विरोध निर्वाचित भएका छन् । अध्यक्ष ओलीले घोषणा गरेको सूचीमा रहेका विष्णु राउत उम्मेदवारी दिन नमानेपछि पन्थी निर्विरोध भएका हुन्।