ओलीले भने: अब ठीक कि बेठीक भन्न पाइदैन

कार्यक्रममा प्रधानमन्त्री ओलीले भने, ‘बहस र तर्क/वितर्क निर्णयमा पुग्नुअघि मात्र स्वाभाविक हुन्छ । तर, जब राष्ट्रले निर्णय लिन्छ, नेतृत्वकर्ताले त्यसलाई दृढतापूर्वक लागू गर्छ । राजकीय मामिलामा प्रतिवद्धता हुन्छ, त्यहाँ ‘यसो वा उसो, किन्तु/परन्तु, अन्यौल र अलमल’लाई स्थान हुँदैन ।’

उनले व्यवहारको कसीमा घोटिने क्रममा नै संघीयताले सफलता पाउने दाबी गरे ।

ओलीले समयको क्रमसँगै संविधानमा नमिलेका विषय संशोधन गरिने प्रतिबद्धता जनाए । मधेस केन्द्रित दलले संविधान दिवसलाई कालो दिनका रुपमा घोषणा गरेर संशोधनका लागि दबाब दिँदै आए पनि तत्काल संशोधन नहुने संकेत गरे ।

‘संघीयता होस् वा संविधान, कतै छेउकुना नमिलेको भए, कहिँ कतै राँटो बाँकी रहेको भए समयक्रममा मिल्छ, मिलाइन्छ । व्यवहारको कसीमा अमिल्दा देखिएका विषयहरुको परिमार्जन र संशोधन हुन्छ, ओलीले भने ।