राष्ट्रपति निवासमा करिव दुई घण्टा बिताएर फर्किए प्रधानमन्त्री ओली
काठमाडौं- प्रधानमन्त्री केपी शर्मा ओली राष्ट्रपति विद्यादेवी भण्डारीसँग भेटवार्ता गरेर फर्किएका छन् । बुधवार साँझ साढे ६ बजे शीतल निवास पुगेका प्रधानमन्त्री ओली करिव ८ बजे शितलनिवासबाट फर्किएका हुन् ।
स्रोतका अनुसार लामो समय छलफल गरेर प्रधानमन्त्री ओली शितलनिवासबाट बाहिरिएका छन् । पछिल्लो राजनीतिक घटनाक्रम र एमाले एकताका बारेमा छलफल भएको बताइएको छ ।
पार्टी विभाजन नजिक पुगेका बेला एकता जोगाउन निकै सक्रिय बनेकी राष्ट्रपतिले एमालेका विभिन्न नेताहरूलाई भेटिरहेकी छन् । स्रोतका अनुसार एमाले विवाद समाधानका लागि भइरहेको कसरत र सर्वोच्चमा विचाराधीन मुद्दाका विषयमा उनीहरुबीच कुराकानी भएको बताइएको छ।
प्रधानमन्त्री ओली कुनै महत्वपूर्ण निर्णय लिनुअघि र पार्टीमा गम्भीर समस्या हुँदा लगातार शितलनिवास धाउने गरेका छन् ।