निर्वाचन आचारसंहिता विपरीत राष्ट्रिय पुनर्निर्माण प्राधिकरणले तराईका बाढी पीडितलाई २५ हजार दिने तयारी
मंसिर ११,काठमाडौं ।। निर्वाचन आचारसंहिता विपरीत राष्ट्रिय पुनर्निर्माण प्राधिकरणले तराई मधेसका बाढी प्रभावितलाई राहत र न्यानो कपडा किन्न २५ हजार रुपैयाँ दिने तयारी थालेको छ ।
बाढीबाट प्रभावित सबै पीडितलाई राहत स्वरुप १५ हजार र न्यानो कपडा किन्न १० गरी २५ हजार रुपैयाँ दिने तयारी अघि बढाएको प्राधिकरणले जनाएको छ । बाढी तथा डुवान प्रभावित क्षेत्रमा पुनस्र्थापना तथा पुनर्निर्माण गराउने विषयको अध्ययन, नीतिगत सम्बोधन र पुनर्निर्माणको समन्वय गर्न कार्तिक ६ गतेको मन्त्रिपरिषद् बैठकले राष्ट्रिय पुनर्निर्माण प्राधिकरण मातहत रहने गरी बाढी पुनर्निर्माण तथा पुनस्र्थापना आयोजना गठन गरेको थियो ।
आयोजनाले बाढी तथा डुबानबाट पूर्ण रुपमा घर क्षति भएका ४१ हजार ६ सय २६ घरपरिवारलाई राहत वितरण गर्ने तयारी थालेको हो । बाढी प्रभावितलाई राहत र न्यानो कपडा किन्नका लागि सहयोग उपलब्ध गराउनु सकरात्मक भएपनि मतदाता प्रभावित पार्ने गरेर चुनावको मुखैमा सरकारले सहयोग दिने तयारी थाल्नु आचार संहिता विपरित हो ।
राष्ट्रिय पुनर्निर्माण प्राधिकरणमार्फत् अनुदानको वितरण सम्बन्धित जिल्ला विपद् व्यवस्थापन समितिले गर्नेछन् । यो वर्षको बाढीबाट अति प्रभावित १८ जिल्लाका १ सय ३४ को ज्यान गएको थियो । बाढीबाट भएको क्षतिको पुनर्निर्माणका लागि ७३ अर्ब २२ करोड ४८ लाख रुपैयाँ हुने राष्ट्रिय योजना आयोगद्धारा तयार बाढीपछिको पुनस्र्थापना आवश्यकता आंकलन प्रतिवेदनमा अनुमान गरिएको छ ।
आयोगका अनुसार बाढीले आवास, स्वास्थ्य, शिक्षा, कृषि, पशुपालन, सिँचाइ, यातायात, पानी तथा सरसफाइ र ऊर्जा क्षेत्रमा ६१ अर्ब ८४ करोड ४८ लाख रुपैयाँ बराबरको क्षति पुर्याएको थियो ।