रियल मड्रिडले भन्यो: नेइमारलाई ल्याउँदैनौ

स्पेनको एक टेलिभिजनले रियल मड्रिडले ब्राजिलका स्ट्राइकर नेइमारलाई अनुबन्ध गर्ने प्रयास गरिरहेको खबर प्रशारण गरेको थियो । तर रियल मड्रिडले भने पेरिस सेन्ट–जर्मेनका स्टार स्ट्राइकर नेइमारलाई अनुबन्ध गर्न प्रयास गरिरहेको भन्ने कुरा अस्वीकार गरेको छ ।

गएको वर्ष २०० मिलियन पाउण्डमा बार्सिलोनाबाट पिएसजी गएका नेइमारले रुसमा जारी विश्वकपमा दुई गोल गरेका छन् र ब्राजिललाई क्वाटरफाइनलसम्म लगिसेका छन् ।

रियल मड्रिडले विज्ञप्ति निकालेर टिभिईले प्रशारित गरेको खबरको खण्डन गरेको हो । रियल मड्रिडले भनेको छ, ‘हामीले नेइमार वा पिएसजी कसैलाई पनि केही प्रस्ताव गरेका छैनौँ ।’

तर टिभिईले भने रियल मड्रिडले नेइमारका लागि २७५ मिलियन पाउण्ड तिर्ने प्रस्ताव गरेको बताएको छ । रियलले गएको वर्षको विश्व कीर्तिमान भन्दा धेरै रकम प्रस्ताव गरेको टिभिईले दाबी गरेको छ ।

रियल मड्रिडले भने टेलिभिजनले प्रशारण गरेको खबर पूरापूर झुठ रहेको बताएको छ । नेइमारको गोलमा ब्राजिलले मेक्सिकोलाई २–० ले हराएपछि टिभिईले यस्तो खबर प्रशारण गरेको थियो ।