न्युजिल्यान्डको जित नै जित
एजेन्सी – न्युजिल्यान्डले इंग्ल्यान्ड र वेल्समा जारी एकदिवसिय विश्वकप क्रिकेट प्रतियोगितामा लगातार तेस्रो जित हात पारेको छ ।
शनिबार राती अफगानिस्तानलाई ७ विकेटले पराजित गर्दै लगातार तेस्रो जित हात पारेको हो । १ सय ७३ रनको लक्ष्य न्युजिल्यान्डले ३२.१ ओभरमा ३ विकेटको क्षतिमा पुरा गर्यो । न्युजिल्यान्डको सहज जितमा कप्तान केन विलियम्सन ९९ बलमा ९ चौका सहित ७९ रनमा अविजित रहे ।
ओपनर मार्टिन गोप्टिल डक,कोलिन मुनरो २२,रोश टेलर ४८ रनमा आउट हुँदा टम लेथम १३ रनमा अविजित रहे । २६ ओभरको चौथो बलमा अफ्तव आलमले बोल्ड आउट गर्नु अघि टेलरले ५२ बलमा ६ चौका र १ छक्का प्रहार गरे । अफ्गानिस्तानका लागि अफ्तव आलमले ३ विकेट लिए ।
टस हारेर ब्याटिङ थालेको अफगानिस्तान ४१.१ ओभरमा अल आउट हुँदै १ सय ७२ रनमा समेटियो । अफगानिस्तानका लागि अन्तिम विकेटका रुपमा आउट भएका मध्यक्रमका हशमतुल्ला शाहिदीले सर्वाधिक ५९ रनको योगदान दिए । उनले ९९ बलमा ९ चौका प्रहार गरे ।
ओपनर हज्रतुल्लाह जजाईले २८ बलमा ५ चौका र १ छक्का सहित ३४ रनको योगदान दिए । नुर अली जदरानले ३८ बलमा ५ चौका सहित ३१ रन जोडे । ओपनर जजाई र नुर अलीले पहिलो विकेटका लागि १०।५ ओभरमा ६६ रनको साझेदारी गर्दै राम्रो सुरुवात दिलाए । जजाइलाई जेम्श निशमले कोलिन मुनरोबाट क्याच गराउँदै पेभिलिएन फर्कासँगै अफगानिस्तानको विकेट पतन सुरु भएको थियो । मध्यक्रमका ब्याट्सम्यान चल्न नसक्दा अफगानिस्तान सस्तैमा रोकिएको हो ।
रमात शाह शुन्य,गुलबदीन नाईब ४,मोहम्मद नाबी ९,इकरान अलिखिल २ र राशिद खान शुन्यमा आउट भए । तल्लोक्रमका अफतव आलमले १० बलमा ३ चौका सहित १४ रनको योगदान दिए । हमिद हसन ७ रनमा अविजित रहे ।
न्युजिल्यान्डका अलराउण्डर जेम्श निशमले १० ओभरमा १ मेडन सहित ३१ रन खर्चेर ५ विकेट लिए । ल्योकी फग्र्युसनले ९.१ ओभरमा ३ मेडन सहित ३७ रन खर्चेर ४ विकेट लिए । कालिन डी ग्राण्डहोमले १ विकेट हात पारे ।
न्युजिल्यान्डले आफ्ना् चौथो खेल आगमी विहीबार भारतसँग खेल्ने छ । यता लगातार तेस्रो खेलमा पराजित भएको अफगानिस्तानले चौथो खेल आगमी शनिवार दक्षिण अफ्रिकाको सामना गर्ने छ ।