संसद पुनर्स्थापना भएकोमा सुवास नेम्वाङ खुशी

काठमाडौँ- प्रमुख प्रतिपक्षी दल नेकपा (एमाले)का संसदीय दलका उपनेता सुवास नेम्वाङले संसद पुनर्स्थापना भएकोमा खुशी व्यक्त गरेका छन् । उनले अदालतको फैसला सहि भएको संकेत गर्दै देउवालाई बधाई दिएका थिए ।

शुक्रबार प्रतिनिधि सभामा बोल्दै पूर्व सभामुख समेत रहेका नेम्वाङले फेरि संसद् चलेको विषयलाई लिएर जनता बलिया भएको बताएका हुन्। “हामी फेरि संसद्‌मा उपस्थित भएका छौं,” नेता नेम्वाङले भने, “प्रतिनिधि सभा विघटनलाई लिएर फरक फरक धारणा हुनसक्छन्, त्यो छुट्टै कुरा हो। यही प्रक्रियाका सन्दर्भमा हामीले नयाँ प्रधानमन्त्री पाएका छौं।”

आज प्रतिनिधि सभामा नवनिर्वाचित प्रधानमन्त्रीलाई बधाई दिने कार्यक्रम रहेको छ। एमालेका तर्फबाट प्रधानमन्त्री देउवालाई बधाई दिँदै नेम्वाङले भने, “हामीले प्रमाणित गरेका छौं, स्थापित गरेका छौं। अब यो देशमा जनता बलिया भएका छन्। जनताको प्रतिनिधिमूलक संस्था संविधान सभाले बनाएको संविधान छ। त्यस अन्तर्गतका प्रतिनिधि सभा, राष्ट्रिय सभा, न्यायपालिका लगायतका संविधानले स्थापना गरेका संस्था क्रियाशील छन्।”

उनले अब मुलुक पछाडि नफर्किने बताए। कतिपय कुरामा सहमति तथा असहमति भए पनि अब पछाडि फर्किन नसकिने बताए। उनले भने, “देश कुनै पनि अवस्थामा पछाडि फर्केर जान सक्दैन। अब जनता बलिया भएका छन्।”

उनले अब मुलुक पछाडि नफर्किने बताए। कतिपय कुरामा सहमति तथा असहमति भए पनि अब पछाडि फर्किन नसकिने बताए। उनले भने, “देश कुनै पनि अवस्थामा पछाडि फर्केर जान सक्दैन। अब जनता बलिया भएका छन्।”

विगतका कमीकमजोरी र घटनाक्रमबाट सिक्दै अगाडि बढ्नुपर्ने उनको भनाइ थियो।

असन्तुष्टि पनि

नेम्वाङले सर्वोच्चको असार २८ गतेको फैसलाले धेरै प्रश्न उठाएको बताए । त्यसले शक्ति पृथकीकरण, नियन्त्रण र सन्तुलनको सिद्धान्तलाई खलबल्याएको पनि उनको दाबी थियो ।

‘सर्वोच्च अदालतले संविधानको अक्षर र भावना, बहुलवादमा आधारित बहुदलीय प्रतिस्पर्धात्मक संघीय लोकतान्त्रिक गणतन्त्रात्मक संसदीय शासन, प्रणाली शक्ति पृथकीकरण एवं नियन्त्रण र सन्तुलनको सिद्धान्त, सार्वभौम सत्ता र राजकीय सत्ता नेपाली जनतामा निहीत रहेको संविधानको आधारभूत प्रस्तावना हो,’ नेम्वाङले भने, ‘सम्मानित सर्वोच्च अदालतको फैसलाले त्यसलाई कमजोर तुल्याएको छ ।’

जनादेशमा जाने कुरालाई निरंकुश भन्ने कुरा गलत भएको पनि नेम्वाङको भनाइ थियो । तर सर्वोच्च अदालतले राज्यका तीन अंगबीचको शक्ति सन्तुलन खलबलिएको आरोप लगाए ।