बन्द भयो मेलम्ची: अब कहिले कहिले आउँछ काठमाडौंमा पानी ? यस्तो छ तालिका
काठमाडौं– उपत्यका खानेपानी लिमिटेडले उपत्यकामा खानेपानी वितरणको कार्य तालिकामा फेरबदल गरेको छ ।
मेलम्ची खानेपानी आयोजनाको मर्मत सम्भार गर्नुपर्ने भएकाले दैनिक वितरण गर्दै आएको १७ करोड लिटर पानी उपलब्ध नहुने भएपछि लिमिटेडल खानेपानी वितरणको तालिकामा फेरबदल गरेको हो ।
मेलम्ची आयोजनाका मर्मत सम्हारको लागि २ महिना लाग्ने अनुमान गरिएको छ । मेलम्चीको मर्मत नसकिएसम्मको लागि बदलिएको खानेपानीको तालिका लागू हुने लिमिटेडले जनाएको छ ।
नयाँ तालिका अनुसार थोरैमा २ दिनमा एकपटक र बढीमा १२ दिन बिराएर पानी वितरण गरिने छ । सोमबार केयूकेएलले जारी गरेको विज्ञप्ति अनुसार महांकाल, मीनभवन, ठिमी स्टेसनबाट वितरण हुने पानी ७ दिन बिराएर वितरण हुनेछ ।
यसैगरी सैबु ललितपुरबाट वितरण हुने पानी सानेपा, मंगलबजार र कुपण्डोलमा १२ बिराएर आउने छ । बालाजु स्टेसनबाट वितरण हुने पानी ९ दिन बिराएर आउनेछ ।
सबैभन्दा कम कीर्तिपुरबाट वितरण हुने पानी भने २ दिन बिराएर दिइने केयुकेएलले सूचना तालिकामा उल्लेख गरिएको छ। पानीको उपलब्धता अनुसार तालिकामा परिमार्जन हुनेसमेत खानेपानी लिमिटेडले जनाएको छ ।
