मातृका यादवको प्रतिकार गर्ने पक्राउ

काठमाण्डुको बल्खुस्थित तरकारी बजारको मूल्य अनुगमनमा गएका उद्योग, बाणिज्य तथा आपूर्तिमन्त्री मातृका यादवसहित सरकारी टोलीको प्रतिकारमा उत्रिएका एक व्यवसायीलाई प्रहरीले पक्राउ गरेको छ ।

मन्त्री यादव सोमबार (आज) बिहानै उद्योग, बाणिज्य, आपूर्ति तथा उपभोक्ता हित संरक्षण विभागको टोलीसहित तरकारी तथा फलफूल बजार पुग्दा व्यवसायी विरोधमा उत्रिएका थिए । प्रतिकारमा उत्रनेहरुको नेतृत्व गरेका व्यवसायी रबी साहलाई पक्राउ गरी महानगरीय प्रहरी वृत्त बल्खुमा राखिएको छ ।

तीन वर्षअघि तत्कालिन बाणिज्य तथा आपूर्तिमन्त्री गणेशमान पुन अनुगमनमा जाँदा व्यवसायीको प्रतिकारमा परेका थिए । व्यवसायीको प्रतिकारपछि मन्त्रीसहितको सरकारी टोली अनुगमन नै नगरी फर्किएको थियो । त्यति बेला पनि प्रतिकार समूहको नेतृत्व पक्राउ परेका साहले नै गरेका थिए ।

केही दिनअघि कालिमाटी तरकारी बजारमा मूल्य अनुगमन गर्न गएको सरकारी टोलीलाई व्यवसायीले घेरा हालेर भित्रै थुनेका थिए । त्यसपछि मन्त्री यादव आफैं कालिमाटी बजार पुगेर स्टलको जथाभावी भाडा असुल्ने कार्यमा संलग्न व्यवसायीमाथि कारबाही गरेका थिए ।