माओवादी स्थायी कमिटी बैठक सकियो: यस्ता छन् निर्णय

काठमाडौं– नेकपा (माओवादी केन्द्र)को आज बिहान बसेको स्थायी समितिको बैठकले केन्द्रीय समितिको बैठक सम्पन्न गर्ने गरी अघि बढ्ने निर्णय गरेको छ। आइतबार बिहान पार्टी कार्यालय पेरिसडाँडामा बसेको बैठकले आजै केन्द्रीय समितिको बैठक सम्पन्न गर्ने गरी अघि बढ्ने निर्णय गरेको हो।

बैठकमा नेताहरुको कार्यविभाजन लगायतका विषयमा छलफल भएको पार्टी प्रवक्ता नारायणकाजी श्रेष्ठले जानकारी दिए। प्रवक्ता श्रेष्ठले केन्द्रीय समितिको बैठकमा समूहगत छलफलबाट आएका रिपोर्टहरुलाई सोमबार बस्ने स्थायी समितिको बैठकले निस्कर्ष निकाल्ने बताए।

प्रवक्ता श्रेष्ठले भने, ’आज बसेको स्थायी समितिको बैठकले सकेसम्म आज नै केन्द्रीय समितिको बैठक सम्पन्न गर्ने गरी अगाडि बढ्ने कोशिश गर्ने समझदारी बनाएका छौं, आजको केन्द्रीय समितिको बैठकमा समूहगत छलफलबाट रिपोर्टहरू आउने छन्, त्यसपछि त्यसको व्याख्या निष्कर्षको लागि स्थायी समितिको बैठक भोलि बस्नेछ।’

आजको केन्द्रीय समितिको बैठकमा पार्टी अध्यक्ष पुष्पकमल दाहाल प्रचण्डले पेश गरेको राजनीतिक तथा सांगठानिक प्रतिवेदनमाथि समूहगत रुपमा छलफल जनाइएको छ। समूहगत छलफलपछि प्राप्त सुझावका आधारमा प्रतिवेदन पास हुने नेता श्रेष्ठले बताए।