गोलकिपरलाई लिभरपुलको हालसम्मकै कीर्तिमानी अफर

एजेन्सी । इटालियन क्लब रोमाका गोलकिपर एलिसन बेकरलाई इंग्लिस क्लब लिभरपुलले कीर्तिमानी रकमको अनुबन्धन प्रस्ताव अघि सारेको छ । लिभरपुलले एलिसनलाई गरेको कीर्तिमानी ६२ मिलियन पाउन्डको प्रस्तावबारे रोमाले छलफल गरिरहेको छ ।

लिभरपुलले २५ बर्षीया ब्राजिलियन गोलकिपर एलिसनलाई ६२ मिलियन पाउण्डको कीर्तिमानी प्रस्ताव राखेपनि रोमाले भने ६६ मिलियन पाउन्ड चाहिने अडान राखेको अन्तर्राष्ट्रिय सञ्चारमाध्यमले उल्लेख गरेका छन्  । एलिसनको लागि गरिएको यो प्रस्ताव गोलकिपरका लागि अहिलेसम्मकै ठुलो रकम हो । रोमाले एलिसनलाई दुईवर्ष अघि मात्रै आफ्नो क्लबमा अनुबन्धन गरेको थियो । गत सिजनमा एलिसनले ३७ सिरी ए खेलमा खेलेका थिए ।

सन् २००१ मा इटालियन क्लब युभेन्ट्सले जियानलुईजी बुफोनका लागि पामालाई ५३ मिलियन युरो तिरेको थियो । सन् २०१७ मा म्यान्चेष्टर सिटीले ४० मिलियन युरोमा कीर्तिमानी रकममा बेन्फिकाका गोलकिपर इडरसनलाई आफ्नो क्लबमा अनुबन्धन गरेको थियो ।