सिंगापुर र अमेरिकामा उपचार गराएकी सीतालाई किन लगिँदैछ भारत ?
काठमाडौँ- नेकपा अध्यक्ष पुष्पकमल दाहाल प्रचण्ड पत्नी सीता दाहालको उपचारका लागि आज भारत जाँदैछन् ।
पुरानै रोग बल्झिएपछि केही दिनदेखि राजधानीको मेडिसिटी अस्पतालमा उपचार गराइरहेकी सीतालाई भारत लगिँदै छ । बिहान ११ बजेको उडानबाट उनलाई भारतको मुम्बई लैजान लागिएको हो ।
प्रचण्डको सचिवालयका अनुसार सीता एक्लै जान नमानेको कारण प्रचण्ड भारत जान लागेको बताइएको छ ।
यसअघि अमेरिका उपचारमा जाँदा पनि प्रचण्ड साथमै गएका थिए । भारत लैजाने तयारी हुँदापनि पत्नी सीताले पनि सँगै जाने चाहना राखेकी थिइन् ।
उपचारका लागि सिता दाहाल, प्रचण्ड र छोरी गंगा दाहाल जाँदैछन् ।
अमेरिकामा उपचार गराएकी सीतालाई किन लगिंदैछ भारत ?
प्रचण्ड पत्नी सीताको उपचार यसअघि सिंगापुर त्यसपछि अमेरिकामा गरिएको थियो । तर यसपटक भारत लैजाने निर्णय भएको छ ।
पछिल्लो राजनीतिक घटनाक्रमले प्रचण्ड भारत जानुलाई अर्थपूर्ण रूपले हेरिएको छ । कहिले त्यहाँ राजनीतिक भेटघाट पनि हुनसक्ने आंकलन गरेका छन् ।
भारत लैजाने तयारी भैरहेका बेला कतिपयले पछिल्लो राजनीतिलाई समेत जोडेर हेरेका छन् ।
सचिवालयले भने यहाँको राजनीतिक परिस्थितिको कारण देखाएर प्रचण्ड नजान खोजेको र सीताले एक्लै नजाने भनेपछि जान लागिएको बताएको छ ।
सीता पार्किन्सन जस्तो देखिने प्रोग्रेसिभ सुपरान्युक्लियर पाल्सी (पी.एस.पी)बाट लामो समयदेखि पीडित छिन् ।