विवादमा केकी अधिकारी
काठमाडौं । अभिनेत्री केकी अधिकारी पछिल्लो समय विवादमा तानिएकी छन् । कला क्षेत्र र बाहिर पनि महिला अधिकारवादी हिसाबमा प्रस्तु हुने अभिनेत्री अधिकारी एउटा गीतको प्रशंशा र साथ दिएका कारणले विवादमा तानिएकी हुन् ।
‘घाँटी भन्दा तल त राम्री नै छे’ बोलको गीतको प्रशंशा गरेको भन्दै उनको आलोचना भएको हो । साथमा उक्त गीतमा अभिनय गरेकी रिमा विश्वकर्माको पनि कतिपय दर्शक स्रोताले आलोचना गरेका हुन् ।
अधिकारीले उक्त गीतको प्रशंशा गर्दै सामाजिक म्युजिकल सञ्जाल टिकटकमा अभिनय नै गरेको भिडियो बाहिर आएको थियो । उक्त गीतले महिलाको अस्मिता वा उसको सुन्दरताको कारकलाई व्यंग्य गरेको भन्दै कतिपय कलाकारले नै आलोचना गरेका थिए ।
अधिकारीमाथि प्रत्यक्ष वा परोक्ष हिसाबले व्यंग्य गरिएका छन् । उक्त गीतले युट्युवमा राम्रो दर्शक पाए पनि आलोचकचाहिँ धेरै आएको छ । एक जना गायिका आस्था राउतले त उक्त गीतले संगीत क्षेत्र नै धुमिल बनाएको र महिलालाई होच्याएको भनी सामाजिक सञ्जाललगायतका ठाउँमा लेखेकी, बोलेकी छन् ।
अधिकारी पछिल्लो समय अभिनेत्री शिल्पा पोखरेलले निर्माता छविराज ओझाको यातना पाएको भन्ने समाचारमा भावुक भई महिला अधिकारका पक्षमा उत्रिएकी थिइन् । त्यसअघि पनि कतिपय सामाजिक विषयमा महिलाहिंसा र होच्याउने विषयको विरोधमा रहँदै आएकी थिइन् ।