वडा कार्यालय भवन निर्माणका लागि जग्गा दान

सुखड,कैलाली । जिल्लाको घोडाघोडी नगरपालिका- ८ को वडा कार्यालय भबन निमार्णका लागी एक व्यक्तिले जग्गादान गरेका छन् । घोडाघोडी नगरपालिका- ८ लठुवा बस्ने ५५ वर्षिय चिरञ्जीवी देबकोटाले वडा कार्यालयको भबन निमार्णका लागी ५ कट्ठा जग्गादान गरेका हुन् ।

अमेरीकामा बसोबास गर्दै आएका जेठा छोरा अपुर्ण देवकोटाकोे पौडी खेल्ने क्रममा केही बर्ष अघि मृत्यु भएको हुँदा उसैको सम्झनामा आफुले वडा कार्यालयलाई जग्गा दान गरेको देवकोटाले जानकारी दिए । मान्छे मरेर जान्छ तर त्यही मान्छेको नाममा दिएको दान अजम्मरी हुन्छ । उनले भने , ‘आफुले दिवङ्गत भएको छोराको सम्झनामा वडा कार्यालयलाई जग्गा दान गर्न पाउदा एकदमै खुशी लागेको छ ।’ देबकोटा पुर्व प्रहरी उपरीक्षक समेत हुन् ।

बुधबार मालपोत कार्यालय धनगढीमा गएर वडा कार्यालयको नाममा ५ कट्ठा जमिन पास गरिएको वडा नं ८ का अध्यक्ष भिम बोगटीले जानकारी दिदै वडा कार्यालयलाई जग्गा दान गरेकोमा देवकोटालाई धन्यवाद समेत व्यक्त गरेका छन् । जग्गा दान गर्ने चिरञ्जीवी देबकोटालाई नगरपालिकाले बिशेष सम्मान गर्ने समेत वडा अध्यक्ष बोगटीले जानकारी दिए । वडा कार्यालयको आफ्नै भवन नहुदा काम गर्न असहज भइरहेको हुँदा अब छिट्टै नै उक्त जग्गामा भवन निर्माण गरि आफ्नै भवनबाट सेवा संचालन गर्ने अध्यक्ष बोगटीले हिमाल पोस्टलाई जानकारी दिए । वडा कार्यालयले भाडाको घरबाट सेवा दिइरहेको छ ।