आइपिएल: राजस्थानलाई हराउँदै कोलकता शीर्ष स्थानमा

जयपुर- कोलकता नाइटराइडर्स आइपिएल क्रिकेटको शीर्ष स्थानमा उक्लिएको छ। बुधवार जयपुरमा भएको खेलमा घरेलु टिम राजस्थान रोयल्सलाई ७ विकेटले पराजित गर्दै कोलकता अङ्क तालिकाको शीर्ष स्थानमा उक्लिएको हो।

कोलकताले ५ खेलबाट ६ अङ्क बटुलेको छ। दोस्रो स्थानको हैदरावादको ३ खेलबाट ६ अङ्क नै छ। पञ्जाव, चेन्नई र राजस्थानले समान ४-४ अङ्क जोडेका छन्।

बुधवार राजस्थानले दिएको १ सय ६१ रनको लक्ष्य कोलकताले ७ बल बाँकी छदा ३ विकेटको क्षतिमा पार गर्‍यो। कोलकताका लगि कप्तान दिनेश कार्तिकले २३ बलमा नटआउट ४२ र नितिश रानाले २७ बलमा नटआउट ३५ रन जोडे। सुनिल नारिनले २५ बलमा ३५ रन जोड्दा रोबिन उथप्पाले ३६ बलमा ६ चौका र २ छक्काको मद्दतले ४८ रन जोडे।

त्यसअघि टस हारेर पहिले ब्याटिङ गरेको राजस्थानले २० ओभरमा ८ विकेटको क्षतिमा १ सय ६० रन जोड्यो। राजस्थानका लागि डिआर्की सर्टले ४४ र कप्तान अजिन्का राहाणेले ३६ रन जोडे। जोस बटलरले १८ बलमा नटआउट २४ रन जोड्दा अन्य ब्याट्सम्यानले उल्लेख्य रन बटुल्न सकेनन्।

बलिङतर्फ कोलकताका नितिश राना र टम कुरानले २-२ विकेट लिए। पियुस चावला, कुलदिप यादव र शिवम माविले समान १-१ विकेट हात पारे।