गुण्डा नाइके लामा दिल्लीमा पक्राउ
काठमाडौं । प्रहरीको ‘मोस्ट वान्टेड’ सूचीमा रहेका गुण्डा नाइके दावा लामा पक्राउ परेका छन् । लामालाई दिल्ली विमानस्थलबाट भारतीय प्रहरीले पक्राउ गरिएको हो ।
दुबईबाट फर्कने क्रममा लामालाई इन्दिरा गान्धी अन्तर्राष्ट्रिय विमानस्थलबाट करिब साढे १० बजेतिर पक्राउ गरिएको भारतीय प्रहरीले जनाएको छ ।
केही समय यता नपाल प्रहरीले निगरानी बढाएपछि लामा फरार थिए । यसअघि उनलाई काठमाडौंको गौरिघाटमा गोली प्रहार भएको थियो ।
गुण्डा नाइके भनेर चिनिने दावाको वास्तविक नाम जितेन्द्र तामाङ हो । महानगरीय प्रहरी प्ररिसर र महानगरीय प्रहरी अपराध महाशाखाले हालै बनाएको १ सय २२ जनाको गुण्डाको सूचीमा लामा पनि रहेका छन् ।
काठमाडौंमा जुवा खेलाउने, पैसा लुट्नेलगायत अपराधिक घटनामा उनको संलग्नता रहेको भन्दै प्रहरीले उनलाई खोजीको सुचीमा राखेको थियो ।
स्रोतका अनुसार उनलाई नेपाल ल्याउने तयारी भइरहेको छ ।