जनआन्दोलन सम्झिँदै सुवास नेम्वाङमाथि खनिए गगन थापा

विराटनगर- नेपाली कांग्रेसका नेता गगनकुमार थापाले राष्ट्रपतिबारे आफूले पनि बोलेको भन्दै राज्यद्रोहको मुद्दा लगाउन चुनौती दिएका छन् । विद्यादेवी भण्डारीले राष्ट्रपति पदको गरिमा राख्न नसकेको भन्दै उनले संसद पुनर्स्थापना भएपछि घर पठाउनेसमेत बताए ।

विराटनगरमा बिहीबार कांग्रेस महानगर समितिद्वारा आयोजित राजनैतिक अवस्था, संवैधानिक संकटको निकास र अवश्यकता विषयक विचार गोष्ठीका क्रममा नेता थापाले संविधान प्रधानमन्त्री केपी शर्मा ओलीको सनकको शिकार भएको बताएका हुन्।

अभिव्यक्ति स्वतन्त्रता हनन् गर्दै रामकुमारी झाँक्रीलाई थुनेर सरकारले लोकतन्त्रको उपहास गरेको उनले आरोप लगाए।

उनले भने, ‘सरकार अब झ्यालाखानाको संख्या बढाऊ। अब म जस्तो बोल्नेविरुद्ध राज्यद्रोहको मुद्दा लगाऊ। तर, अझैपनि म भन्छु, राष्ट्रपतिले पदको गरिमा राख्न सक्नुभएन। अब चपलीस्थित घर पठाउने हो।’

राष्ट्रपतिबारे दिएको अभिव्यक्तिलाई लिएर प्रहरीले राज्यविरुद्धको कसुरबारे अनुसन्धानका लागि भन्दै नेकपा प्रचण्ड–माधव समूहकी केन्द्रीय सदस्य रामकुमारी झाँक्रीलाई बिहीबार विहान पक्राउ गरेको थियो ।

राष्ट्रपतिका विषयमा बोलेकै भरमा रामकुमारी झाँक्रीलाई राज्यद्रोहको मुद्दा लगाउने तयारी गरेको भन्दै उनले आफूले पनि राष्ट्रपतिका विषयमा बोलेको बताए । नेपाली कांग्रेस विराटनगर महानगरसमितिको कार्यक्रममा थापाले भने, ‘राष्ट्रपति भनेको व्यक्ति होइन संस्था हो । उहाँ (विद्या भण्डारी) ले संस्थाको गरिमा राख्न सक्नुभएन । संसद् पुनर्स्थापना भएपछि राष्ट्रपतिलाई घर फिर्ता पठाउने हो ।’

‘मैले पनि राष्ट्रपतिबारे बोलेको छु, हिम्मत छ भने राजद्रोहको मुद्दा हामी सबैलाई लगाऊ, झ्यालखानाको संख्या अझै बढाऊँ’ उनले अघि भने, ‘महाराजको आदेशले छेकिएन श्रीमान, तपाईको आदेशले पनि छेकिन्न ।’

उनले २०६२/२०६३ को जनआन्दोलनका क्रममा आफू लगायतका विद्यार्थी नेताहरुमाथि राज्यद्रोहको मुद्दा लागेको क्षण सम्झिाए ।

राजाविरुद्ध अमर्यादित नारा लगायो भनेर आफूमाथि मुद्दा लागेको भन्दै उनले भने, ‘मेरो मुद्दामाथि बहस हुँदै गर्दा नेपाल विद्यार्थी संघका साथीहरु अदालत परिसरमा आएर त्यही नारा लगाए, जुन नारा लगाउँदा ममाथि मुद्दा लागेको थियो । मेरो वकिलले भन्नुभयो श्रीमान एकछिन अदालतमा मौनता चाहन्छु । अदालतमा सन्नाटा छायो, तलबाट नारा लागिरहेको थियो । मेरो वकिलले भन्नुभयो श्रीमान गगन थापालाई राजद्रोही भन्ने हो भने यी सबैलाई राजद्रोही भन्नुपर्छ ।’

‘त्यसो भन्ने वलिक को हुनुहुन्थ्यो थाहा छ ? सुवास नेम्वाङ हुनुहुन्थ्यो । आज बालुवाटारको दुलोमा लुकेर बस्नुभएको छ’ थापाले अघि भने, ‘श्रीमान्, तपाई बदलिनु भयो होला, हामी बदलिएका छैनौं ।’

प्रधानमन्त्री केपी शर्मा ओलीले अभिव्यक्ति स्वतन्त्रता कुन्ठित पार्ने नयाँ नियम ल्याउन लागेको बताउँदै उनले त्यसको पनि विरोध गर्ने बताए ।

सरकारमा रहेकाहरुको डर, त्रास नमानेर अदालतले स्वतन्त्र निष्पक्ष ढंगबाट कानुनको व्याख्या र कार्यान्वयन गर्नुपर्नुेमा नेता थापाले जोड दिए। जनताको भविष्य र व्यवस्था जोगाउने मौका अदालत समक्ष आएको बताउँदै उनले अदालतले मौकाको सदुपयोग गर्ने अपेक्षा कांग्रेसले गरेको बताए।

कार्यक्रममा प्रदेशहरु जनताको भावना मर्म अनुरुप चल्न नसकेको आरोप लगाए। प्रदेश १ मा मुख्यमन्त्री शेरधन राई प्रधानमन्त्री केपी शर्माको फोटोकपी भएको उल्लेख गरेका नेता थापाले मुख्यमन्त्री राईले प्रदेश चलाउन नसकेको टिप्पणी गरे।