देउवा-ओली दुई चरण वार्ता सकियो, सबै कुरा गोप्य राखियो
काठमाडौँ- प्रधानमन्त्री शेरबहादुर देउवा र एमाले अध्यक्ष केपी शर्मा ओलीबीचको भेट सकिएको छ । तर उनीहरूबीच भएको वार्ता र संवादलाई गोप्य राखिएको छ ।
देउवा र एमाले अध्यक्ष केपी शर्मा ओलीबीच झण्डै दुई घण्टा लामो वार्ता भएको छ । ओली निवास बालकोटमा राति ८ बजेर ५० मिनेटमा बालकोट पुगेका देउवा राति सवा १० बजे बालुवाटार फर्किएका हुन् ।
योबीचमा देउवा र ओलीबीच दुई चरणमा छलफल भयो । पहिलो चरणमा छलफल सकेर बालुवाटार फर्किन लागेका देउवाले फेरि ओलीले बोलाएका थिए । त्यसपछि देउवा र ओली अर्को चरणको वार्तामा बसेका थिए ।
एमसीसी अनुमोदनको विषयलाई लिएर सत्तागठबन्धन नै धरापमा परेपछि बिहीबार बेलुका देउवा र ओलीबीच ओली निवासमा झन्डै दुई घण्टा छलफल भएको हो ।
छलफलमा के कुरा भयो भन्ने दुबै नेताहरुले बाहिर ल्याउन चाहेका छैनन् । ओलीको सचिवालयले उनीहरुबीचको संवादमा एमसीसी र राजनीतिक गतिविधिबारे कुराकानी भएको तर मिडियालाइ केही भन्ने कुरा नभएको बताएको छ ।