डा. केसीबारे छलफल गर्न बालुवाटारमा बैठक

१९ दिनदेखि अनशनरत डा. गोविन्द केसीको स्वास्थ्य नाजुक बनेपछि त्यसबारे छलफल गर्न सत्तारुढ नेपाल कम्युनिष्ट पार्टी (नेकपा) को आकस्मिक बैठक बसेको छ ।

डा. केसीले उठाएका चिकित्सा शिक्षा सुधारका माग पूरा गर्न र उनको जीवनरक्षा गर्न सरकार गम्भीर नबनेको भन्दै आलोचना चौतर्फी चुलिएपछि २ साउन साँझ प्रधानमन्त्री निवास बालुवाटारमा सत्तारुढ नेकपा केन्द्रीय सचिबालय बैठक बसेको हो ।

नेकपाका अध्यक्ष पुष्पकमल दाहाल र वरिष्ठ नेता माधवकुमार नेपालको पहलमा आकस्मिक रुपमा सचिबालयको बैठक बोलाइएको थियो, जुन प्रधानमन्त्री एवम् नेकपा अध्यक्ष केपी शर्मा ओलीको ‘सेड्युल’मा थिएन ।

बैठक डा. केसीको अनसन र उनले उठाएका मागमा केन्द्रित भएको नेकपाका सचिबालय सदस्य नारायणकाजी श्रेष्ठले बताए ।

स्रोतका अनुसार, बैठकमा अध्यक्ष दाहाल र वरिष्ठ नेता नेपालले केसीको अनशन प्रकरणमा सरकारले देखाएको व्यवहारले सरकार र पार्टी दुवैलाई क्षति पुर्‍याएको भनाइ राखेका थिए ।

बैठकमा अनशन प्रकरणबाट सिर्जित समस्याको समाधान कसरी गर्ने भन्नेबारे मध्यमार्गी बाटो खोज्ने छलफल भएको बताइएको छ ।

प्रधानमन्त्री ओली, नेकपा अध्यक्ष दाहाल र बरिष्ठ नेता नेपालसँगै नेता नारायणकाजी श्रेष्ठ र शिक्षामन्त्री गिरिराजमणि पोखरेल समेत बैठकमा सहभागी थिए ।