पाल्पाको दोभानमा भिषण पहिरो: ६ घर बगे, कैयौँ बेपत्ता

पाल्पा — पाल्पामा भिषण पहिरो गएको छ । पाल्पाको तिनाउ गाउँपालिका–५ मा पहिरोले ६ घर बगाउएको छ भने एक जनाको मृत्यु भएको छ ।

सिद्धार्थ राजमार्गअन्तर्गत हिउदेखोला नजिकै बिहिबार खसेको पहिरोमा चार वर्षीय बालक बेपत्ता छन् भने ७ जना घाइते भएको बताइएको छ ।

खोलामा खसेको पहिरोले ६ घर बगाएको बताइएको छ । स्थानीय वीरबहादुर गुरुङको पहिरोमा पुरिएर मृत्यु भएको प्रहरीले जनाएको छ भने पूजा परियारका चार वर्षीय छोरा बेपत्ता भएको प्रहरीले जनाएको छ ।

दोभान प्रहरीका अनुसार नरबहादुर राना, आकाश तामाङ, हरि दर्लामी, वीरबहादुर गुरुङ र रमेश परियारको घर पहिरोले बगाएको छ । पहिरोले सिद्धार्थ राजमार्ग अवरुद्ध भएको बताइएको छ । हिउँदे खोला, झुम्सा, दोभानका विभिन्न स्थानका साथै सिद्धबाबा क्षेत्रमा पहिरो खसेको छ ।