धोनीलाई धम्की
एजेन्सी । भारतीय क्रिकेट टिमका पूर्वकप्तान महेन्द्रसिंह धोनीलाई धम्की आएको छ । इन्डियन प्रिमियर लिग क्रिकेट (आईपीएल) मा लगातारको हारका कारण कप्तान धोनीसँगै उनको परिवारलाई सामाजिक सन्जालमार्फत धम्की आएको हो ।
चेन्नई सुपर किंग्सको कप्तानी गरिरहेका धोनीसहित उनकी छोरीलाई लिएरसमेत सामाजिक सन्जालका एक प्रयोगकर्ताले अभद्र टिप्पणी गर्दै धम्की दिएका छन् । यससँगै राँची पुलिसले धोनीको घरमा सुरक्षा बढाउने निर्देशन दिएको जनाएको छ ।
धोनीलाई धम्कीको कारण आईपीएलको तीनपटक च्याम्पियन धोनीको कप्तानीको टिम चेन्नई सुपर किंग्स र धोनीको यस सिजनमा निराशाजनक प्रदर्शनले गर्दा यस्तो टिप्पणी आएको बुझिएको छ ।
चेन्नई सुपर किंग्स आईपीएलको १३औं सिजनमा अहिलेसम्म ७ खेल खेलिसकेको छ । जसमा चेन्नईले मात्र दुई खेलमा जित निकालेको छ । बाँकी पाँच खेलमा भने हार व्यहोरेको छ ।