याचना गर्न देउवाले बोलाए आफू निकट नेताहरू

काठमाडौं- नेपाली कांग्रेसका सभापति शेरबहादुर देउवाले आफूनिकट नेताहरूलाई छलफलका लागि बोलाएका छन् । देउवाले महाधिवेशनबारे छलफल गर्न भन्दै नेताहरूलाई बोलाएका हुन् ।

छलफलमा देउवाले १४ औं महाधिवेशन समयमा गर्न नसकिएको विषयमा याचना गर्ने बुझिएको छ । अहिले देउवा निवास बूढानीलकण्ठमा छलफल शुरू भएको बताइएको छ । छलफलमा देउवानिकट पदाधिकारी र केन्द्रीय सदस्यहरू सहभागी छन् ।

बैठकमा देउवाले भदौ १६ मा महाधिवेशन उद्घाटन हुने अवस्था नरहेकाले विकल्पबारे सुझाव दिन आग्रह गरेका छन् । वरिष्ठ नेता रामचन्द्र पौडेल पक्षले भदौ २३ भित्रै महाधिवेशन गर्नुपर्ने माग राखेको बेला देउवाले आफ्नो समूहको रणनीति बनाउन छलफल थालेका हुन् ।

आजै क्रियाशील सदस्यता विवाद टुंगो लगाउन जिम्मेवारी पाएका शीर्ष नेताहरूको बैठक पनि बस्दैछ । कांग्रेस केन्द्रीय समितिको बैठक भोलि बस्नेछ । बैठकबाट महाधिवेशनको नयाँ कार्यतालिका ल्याउने संस्थापन पक्षको तयारी छ ।