सभापति देउवामाथि आरजु राणाको काउन्टर
काठमाडौं- देउवा पत्नी तथा नेपाली कांग्रेसकी नेतृ आरजु राणा देउवाले सभापति शेरबहादुर देउवामाथि काउन्टर गरेकी छन् ।
सभापति देउवाले केहिदिन अगाडी ३३ प्रतिशत महिला भोटर थप्न महिला सांसदहरूलाई उर्दी जारी गरेको बिषयमा उनले काउन्टर गरेकी हुन् । आरजुले महिलाहरू भोटरमा मात्रै सिमित गर्न खोजेको आरोप समेत लगाइन।
नेपाल महिला संघ, केन्द्रिय समितीले गरेको भर्चुअल बैठकमा नेतृ देउवाले महिलाहरु देशको नेतृत्व गर्ने तहमा आउनुपर्ने बताएकी हुन् । उनले सभापति देउवालाई महिलाहरु भोटर मात्रै हुने ? भन्दै प्रश्न गरेकी छन् ।
‘३३ प्रतिशत महिला जहिल्यै पनि भोटर मात्रै हुन् ? पार्टीको भोटर लिष्टमा चाँही हामी मात्रै हुने । ३३ प्रतिशत मत हाल्नुपर्ने’, उनले भनिन्, ‘हाम्रो महिला त सहमहामन्त्रीमा मात्रै सिमित भयो । यो त अन्यायपूर्ण भएजस्तो लाग्यो । सिटौला जी शेरबहादुरजीसँग कम्पिटिसन गर्ने हैसियत हामी महिलाहरुको बनेकै छैन् ।’
त्यस्तै उनले ७७ वटै जिल्लाका पार्टी सभापति र वडा सभापतिहरुलाई ३३ प्रतिशत महिलालाई ३० देखि ४० प्रतिशत क्रियाशील सदस्यता दिन माग गरेकी छन् ।
‘म पार्टी सभापतिज्यूलाई अनुरोध गर्न चाहान्छु । हरेक जिल्लाका पार्टी सभापति र वडा सभापतिहरुले ३३ प्रतिशत महिलाका लागि धेरै बखेडा नगरी आफैं विवेक प्रयोग गरेर ३० देखि ४० प्रतिशत क्रियाशील सदस्यता दिलाउनुहुनु अनुरोध गर्दछु’, उनले भनिन् ।
सभापति देउवाले ३३ प्रतिशत महिलाले भोटर ल्याउन आग्रह गरेका थिए । उनले आम चुनावमा महिलाले चुनाव लडेर आउन आग्रह गरेका थिए ।
‘जहाँ पनि हामी हार्दै आइरहेका छौं । महिलालाई राष्ट्रपतिमा उठाएका हौं नि के गर्नु जित्ने होइन । भोली जनताबाट चुनाव जित्ने तयारी गर्नुपर्यो’, उनले भने ।