प्रधानमन्त्री र सभामुखबीच चर्काचर्की: ठाकुरलाई संसदको अध्यक्षता गर्न देउवाको प्रस्ताव

काठमाडौं- प्रधानमन्त्री शेरबहादुर देउवाले सभामुख अग्निप्रसाद सापकोटालाई बालुवाटारमा बोलाएर अमेरिकी सहायता परियोजना एमसीसी सम्झौता संसदमा टेबल गर्न आग्रह गरेपछि दुई जनाबीच चर्काचर्की भएको छ । देउवाले आग्रह गरेपनि सभामुख सापकोटाले भने राष्ट्रिय सहमति नभई आफूले कुनै हालतमा एमसीसी टेबल नगर्ने जवाफ दिएपछि तनावको अवस्था बनेको थियो ।

प्रधानमन्त्री देउवानिकट नेपाली कांग्रेसका एक नेताकाअनुसार एमसीसी टेबल गर्ने विषयमा प्रधानमन्त्री देउवा र सभामुख सापकोटाबीच त्यो दिन तनावको स्थिती बनेको थियो । त्यसपछि माओवादीका अध्यक्ष पुष्पकमल दाहाल प्रचण्डलाई फोन गरेर देउवाले तनावबारे जानकारी गराएका थिए ।

‘प्रधानमन्त्रीको हैसियतले म भन्दै छु, तपाईले एमसीसी टेबल गर्नुहोस्,’ प्रधानमन्त्री देउवा र सभामुख सापकोटाबीच भएको संवादलाई उद्धृत गर्दै कांग्रेसका ती नेताले भने । जवाफमा सभामुख सापकोटाले माओवादी केन्द्रका अध्यक्ष पुष्पकमल दाहालबाट आज्ञा भए तत्काल एमसीसी टेबल गर्ने जवाफ दिए ।

त्यसका लागि राष्ट्रिय सहमति पूर्वशर्त रहेको सापकोटाले बताए । सभामुख सापकोटाले एमसीसी टेबल गर्न असहयोग गर्ने संकेत प्रधानमन्त्री देउवाले झण्डै दुई महिनाअघि नै बुझिसकेका थिए । त्यसपछि देउवा विपक्षी दलहरु नेकपा एमालेका अध्यक्ष केपी शर्मा ओली र लोकतान्त्रिक समाजवादी पार्टीका अध्यक्ष महन्थ ठाकुरसँग निरन्तर संवादमा रहे ।

प्रधानमन्त्री देउवाले कहिले टेलिफोनमा त कहिले आफ्ना दूतमार्फत ओली र ठाकुरसँग निरन्तर संवाद गरिरहेको खुलेको छ । त्यसपछि प्रधानमन्त्रीको दूत बनेर सञ्चारमन्त्रीसमेत रहेका कांग्रेस नेता ज्ञानेन्द्रबहादुर कार्की एमाले अध्यक्ष ओलीसँग कुरा गर्न पटक पटक बालकोट गएका थिए ।

अहिले पनि प्रधानमन्त्री देउवा एमसीसी पारित गराउन एमाले अध्यक्ष ओली र लोसपा अध्यक्ष ठाकुरसँग निरन्तर संवादमा रहेको बताइन्छ । लोसपा अध्यक्ष ठाकुरलाई गत साता प्रधानमन्त्री देउवाले बालुवाटारमा बोलाएर एमसीसीमा सहयोग गर्न आग्रह गरेका थिए ।

ठाकुरले भने सकेसम्म राष्ट्रिय सहमति कायम भए राम्रो हुन्थ्यो भन्दै प्रधानमन्त्री देउवालाई सकारात्मक जवाफ दिएको बताइएको छ । त्यसमा देउवाले सभामुखले आलटाल मात्रै गरे हेरेर नबस्ने भन्दै ठाकुरलाई संसदको ज्येष्ठ सदस्यको हैसियतमा तयार हुन समेत ठाकुरलाई आग्रह गरेका थिए ।

ठाकुरको अध्यक्षतामा एमसीसी टेबल गर्ने रणनीति

महन्थ ठाकुर संसदका ज्येष्ठ सदस्य हुन् । सभामुख सापकोटालाई हटाएको खण्डमा संसदको ज्येष्ठ सदस्यले संसद चलाउन पाउने व्यबस्था छ । सभामुख सापकोटाले एमसीसी टेबल गर्न असहयोग गरिरहे विकल्पमा संसदको ज्येष्ठ सदस्यको हैसियतमा त्यो भूमिका अध्यक्ष ठाकुरले लिनुपर्ने प्रधानमन्त्री देउवाले बताएका थिए ।

एमसीसी अनुमोदनका लागि संसद सूचारु गर्ने वातवरण बनाउन प्रधानमन्त्री देउवाले एमाले अध्यक्ष ओलीसँग पटक पटक आग्रह गरिरहेका छन् । तर ओली सभामुख सापकोटाको राजीनामा नआएसम्म वा उनलाई नहटाएसम्म संसदमा अवरोध जारी रहिरहने अडानमा छन् ।

आफू प्रधानमन्त्री भएका बेला नै एमाले अध्यक्ष ओलीले एमसीसी टेबल गर्न खोजेका थिए । त्यसबेला सभामुख सापकोटा नै बाधक बने । अहिले पनि प्रधानमन्त्री देउवाले एमसीसी टेबल गर्न भन्दैछन्, तर सभामुख सापकोटा टसकोमस भएका छैनन् । सभामुख सापकोटा हटे संसद पनि खोल्ने र एमसीसी पारित गर्नसमेत प्रधानमन्त्री देउवालाई साथ दिने पक्षमा एमाले छ ।

प्रधानमन्त्री देउवा र नेकपा माओवादी केन्द्रका अध्यक्ष प्रचण्डले एमसीसी मुख्यालयलाई दिएको समयसीमा घर्किँदै गर्दा प्रधानमन्त्री देउवा एमसीसी पारित गर्नैपर्ने दबाबमा छन् । देउवा र दाहालले संयुक्त हस्ताक्षर गर्दै एमसीसी पास गर्ने प्रतिबद्धतासहितको पत्र गत असोजमा एमसीसी मुख्यालयमा पठाएका थिए । सोही प्रतिबद्धतालाई आधार मान्दै एमसीसी मुख्यालयले संसदबाट एमसीसी पारित गराउन ताकेता गरिरहेको छ ।

एमसीसी पारित गराउँछु भन्दै पत्रमा हस्ताक्षर गर्ने तर आफ्नै हस्ताक्षरको स्वामित्व लिन प्रचण्ड तयार नभएपछि प्रधानमन्त्री देउवा विकल्प खोज्न थालेका हुन् । प्रधानमन्त्री देउवा जसै एमसीसी पारित गर्नुपर्ने बाध्यतामा छन, चाहे गठबन्धन रहोस् वा टुटोस् ।