देउवा सरकारले माखो पनि मार्न सकेन: केपी शर्मा ओली
काठमाडौं- एमाले अध्यक्ष केपी शर्मा ओलीले देउवा सरकारलाई गम्भीर आरोप लगाएका छन् । ओलीले आफूले विघटन गरेको समयदेखि अहिलेसम्म संसद्ले कुनै काम गर्न नसकेको बताएका छन् ।
काठमाडौंमा पत्रकार सम्मेलन गर्दै उनले सरकारले माखो पनि नमारेको बताएका छन्। उनले आफ्नो पार्टी विभाजन गर्न मध्यराति संसद्को अधिवेशन अन्त्य गरेर अध्यादेश जारी गरेको आरोप पनि देउवा सरकारलाई लगाएका छन् ।
“सरकारले राजनीतिक पार्टीभित्र बदनियत साथ हात हालेर प्रतिपक्ष पार्टी फुटाउने जुन काम गरेको छ त्यो अनैतिक काम हो,” ओलीले भने, “अहिले देशको समय बर्बाद गर्ने काममात्रै भएको छ । संसद्ले केही माखो मारेको छ । पुस ५ देखि अहिलेसम्म संसद्ले के गरेको छ ?”
पार्टी विभाजनपछि पहिलोपटक पत्रकार सम्मेलन गरेर ओलीले आफ्नो पार्टी एमाले विभाजन गर्ने गरी अचानक मध्यरातिबाट संसद्को अधिवेशन अन्त्य गरेर राजनीतिक दलसम्बन्धी अध्यादेश जारी गरेको आरोप लगाए ।
तर, उक्त अध्यादेशले आफ्नै पार्टीमा पहिरो जाने त्रासमा सत्तारुढ गठबन्धनमा आवद्ध दलहरु रहेका र फेरि उनीहरुले सो अध्यादेशलाई सच्याउने ओलीको भनाइ छ ।
अनुचित ढंग र कार्यबाट प्रतिपक्षी दल एमाले फुटाउने कार्यमा सरकार लागेको उनको आरोप छ ।
अध्यादेश जारी भएपछि एमालेबाट अलग्गिएर माधवकुमार नेपालले नेकपा एकीकृत समाजवादी दल दर्ताका लागि निर्वाचन आयोगमा निवेदन दिएका छन् ।
साथै, महन्थ ठाकुरले पनि लोकतान्त्रिक समाजवादी पार्टी दर्ताका लागि आयोगमा निवेदन दिएका छन् । दुवै दल दर्ताका लागि आयोगले अहिले धमाधम सनाखत गराइरहेको छ । यदि दुवै दलले केन्द्रीय सदस्य र संसदीय दलमा २०/२० प्रतिशत जुटाउन सके भने नयाँ दलको प्रमाणपत्र पाउनेछन् ।