दिल्लीमा पशुपति सम्पर्क मञ्चको रक्तदान सम्पन्न ,७९जनाले दिए रगत
नयाँ दिल्ली
विगत कयौँ वर्षदेखि भारतको राजधानी दिल्लीमा सामाजिक काम गर्दै आएको श्री पशुपति सम्पर्क मञ्च दिल्लीले रक्तदान कार्यक्रम सम्पन्न गरेको छ ।
रक्तदान महादान रक्तदान जीवनदान हो भन्ने मान्यताका अनुसार मञ्चले रेडक्रस सोसाइटीको साझेदारीमा दिल्लीको गोविन्दपुरीस्थित गुरुद्वारा परिसरमा रक्तदान कार्यक्रमको आयोजना गरेको हो । आइतबार गरिएको रक्तदान कार्यक्रममा ७९ जनाले रक्तदान गरेका छन् ।
प्रमुख अतिथि नेपाल पत्रकार महासङ्घ भारतका अध्यक्ष लोकेश शाह रहेको कार्यक्रममा अध्यक्ष रमेश शर्मा लम्सालले अध्यक्षता गरेका थिए । वार्षिक रूपमा गरिँदै आएको कार्यक्रममा बर्सेनि करिव ८० जनाले रक्तदान गर्ने गरेको अध्यक्ष लम्सालले बताए ।
रक्तदान कार्यक्रम सहित भण्डारा (भोजन ग्रहण) कार्यक्रम समेत आयोजना गरिएको थियो । सचिव दिपेन्द्र ढकालले सञ्चालन गरेको कार्यक्रममा विभिन्न सङ्घ-सङ्गठनका प्रतिनिधि, सञ्चारकर्मीसहित आम प्रवासी नेपालीको उपस्थिति रहेको थियो ।
नेपालीहरूलाई चाहिएको बेला सहज रूपमा रगत उपलब्ध गराउन आफूहरूले विगत सन २००७ बाट रक्तदान शिविरको आयोजना गर्दै आएको मञ्चका पूर्व अध्यक्ष तुलसी ढकालले बताए । श्री पशुपति सम्पर्क मञ्चले भारतका विभिन्न सामाजिक सेवा गर्दै आएको छ ।
नेपालमा गएको विनाशकारी भूकम्पका बेला १०५ युनिट रगत पठाउनुका साथै, बद्रीनाथ केदारनाथमा गएको बाढीका बाढीपीडित महिलाहरूलाई सीलाई मेसिन प्रदान गरेको थियो । त्यसै गरी बेला-बेलामा गरिब असहायका लागि खानपिनका सामग्री र लत्ताकपडा पनि वितरण गर्दै आएको मञ्चले जनाएको छ ।
