दशैंमा धेरै मासु खाँदा लाग्न सक्छन् यस्ता रोग
दशैंमा शक्तिको आराधना, आफन्त जमघट तथा आफूभन्दा ठूलाबाट आशिर्वाद लिने कुरा जति महत्त्वपूर्ण छ, त्यति नै महत्त्व मीठामीठा परिकार बनाएर खाने कुराको पनि छ ।
अधिकांशले मासुको परिकारसँग दशैं मनाउने गर्छन् । नेपालीको नराम्रो बानी के छ भने दशैंमा मासु खाने क्रममा लिमिट भुल्छन् र पाएसम्म खाइदिन्छन् ।
मासु स्वास्थ्यका लागि उपयोगी चिज नै हो । तर यसलाई धेरै सेवन गर्दा स्वास्थ्यमा प्रतिकुल असर पर्ने वीर अस्पतालका वरिष्ठ मुटुरोग विशेषज्ञ डाक्टर प्रकाशराज रेग्मी बताउँछन् ।
यसले स्वास्थ्यमा तत्कालीन र दीर्घकालीन समस्या निम्त्याउने उनको भनाइ छ ।
कस्तो समस्या देखिन्छ ?
मासु धेरै खाँदा तत्कालीन अवस्थामा पेटसम्बन्धी समस्या आउनसक्ने डा. रेग्मीको भनाइ छ ।
उनका अनुसार मासु धेरै खाँदा देखिनसक्ने तत्कालीन समस्या यस्ता छन् :
अपच भएर पेट दुख्छ ।
कलेजो, पित्तथैलीलाई भार बढी पर्छ ।
पित्तथैलीमा पथ्थरीको समस्या भएको व्यक्तिलाई अत्याधिक पेट दुख्ने हुन्छ ।
मुटुको धड्कन आवश्यकताभन्दा माथि पुग्छ ।
दीर्घकालीन असर
हार्टअट्याक हुनसक्छ ।
प्यांक्रियाज ग्रन्थीलाई असर पर्छ र प्यांक्राटाइटिस भन्ने रोग लाग्न सक्छ ।
क्यान्सर हुने खतरा हुन्छ ।
मुटुसम्बन्धी रोग लाग्न सक्छ ।
मिर्गौलामा समस्या आउन सक्छ ।
मुटुको चाल गडबडी हुने समस्या देखिन्छ ।
उच्च रक्तचाप र मोटोपनाको समस्या बढ्छ ।
दशैंमा मासु बढी खाएकै कारण उच्च रक्तचाप, कोलेस्टोर वृद्धि भई औषधिको मात्रा बढाउनुपर्ने अवस्था आउन सक्ने भन्दै समयमै सचेत हुन उनको आग्रह छ । अघिल्ला वर्षहरूमा पनि मासु धेरै खाएकै कारण अस्पतालमा आकस्मिक रूपमा धेरै बिरामी आएको भन्दै डा. रेग्मीले मासु खाँदा सचेत हुन आग्रह गरे ।