कांग्रेसको केन्द्रीय कमिटि बैठक आज, विभिन्न समिति गठन गरिने
काठमाडौँ- नेपाली कांग्रेसको केन्द्रीय कमिटिको बैठक आज आइतबार बस्दैछ । १४ औँ महाधिवेशनको तयारी गर्न नेपाली कांग्रेसको केन्दीय समिति बैठक बस्न लागेको हो ।
प्रधानमन्त्री समेत रहेका पार्टी सभापति शेरबहादुर देउवाको निजि निवास बुढानिलकण्ठमा बैठक दिउँसो १ बजे बस्ने कांग्रेसका एक केन्दीय सदस्यले बताए ।
मंसिर २४ देखि २६ गतेसम्म काठमाडौँमा हुने १४ औं महाधिवेशनको तयारीका लागि बैठक बस्न लागेको बताइएको छ । बैठकले राजनीतिक प्रतिवेदन, मूल व्यवस्थापन, खाना तथा आवास, प्रचार, मञ्च व्यवस्थापन , यातायात व्यवस्थापन लगायतका समिति गठन गर्ने कांग्रेसले जनाएको छ ।
यसअघि शनिबार बसेको पदाधिकारी बैठकले केन्द्रीय समिति बैठकबाट महाधिवेशनका लागि आवश्यक निर्णय लिने सहमति गरेको थियो ।