नेपालले चीनलाई ११ लाख १५ हजार रुपैयाँको चिप्लेकिरा बेच्यो - Himal Post Himal Post
  • १४ चैत्र २०८०, बुधबार
  •      Wed Mar 27 2024
Logo

नेपालले चीनलाई ११ लाख १५ हजार रुपैयाँको चिप्लेकिरा बेच्यो



काठमाडौं । २०७४ को साउनदेखि असारसम्मको १२ महिनाको अवधिमा नेपालले चीनलाई ११ लाख १५ हजार रुपैयाँको चिप्लेकिरा बेचेको छ । यो अवधिमा, ९ हजार ६ सय १ किलो चिप्लेकिरा चीन निर्यात गर्दा ११ लाख १५ हजार रुपैयाँ आम्दानी भएको भन्सार विभागले जनाको छ । यो हिसाबले, चिप्लेकिरा किलोको १ सय १६ रुपैयाँको दरले बिक्री भएको छ ।

जमिनमा बस्ने चिप्लेकिरादेखि सफा पानीमा बस्ने र समुद्री चिप्लेकिरा चीन सहित स्पेन, फिलिपिन्स, मोरक्को, नाइजेरिया, अल्जेरिया, क्यामरुन, फ्रान्स, इटली, पोर्चुगल, ग्रीस, बुग्लेरिया, बेल्जियम, भियतनाम, लाओस, कम्बोडिया, साइप्रस, घाना, माल्ट र नेपालका तराई क्षेत्रमा समेत खाने गरिएको पाइन्छ । तर, नेपालले भने यसको निर्यात चीनमा मात्रै गरेको विभागको तथ्यांकमा उल्लेख छ ।

यौनवर्द्धक खुराक !

विश्वका विभिन्न मुलुकमा चिप्लेकिराको परिकार बनाएर खाइन्छ । यसका अतिरिक्त चिप्लेकिरा खाँदा हाडजोर्नी दुखेको चोटपटक लागेको ठीक हुन्छ । यसका साथै ताकत बढ्छ ।

नेपालका ग्रामिण भेगमा पहिलेदेखि चिप्लेकिरा र यसको फुल औषधीको रुपमा खाने चलन छ । केही ठाउँमा गोरुलाई खुराकका रुपमा चिप्लेकिरा खुवाउने गरिन्छ । चिप्लेकिरा खाएमा यौन शक्ति बढ्ने आयुर्वेदिक चिकित्सकहरुको दाबी छ ।

विश्वका केही मुलुकमा महामारी नियन्त्रणका लागि समेत चिप्लेकिराको प्रयोग भएको पाइन्छ । सन् १८०० को दशकमा स्कटल्याण्डमा प्लेग फैलिएको बेलामा चिप्लेकिरालाई खानाको रुपमा प्रयोग गरेको इतिहास छ ।

चिप्लेकिराको प्रयोग सौन्दर्य सामग्री बनाउन समेत प्रयोग गर्ने गरेको पाइन्छ । अनुहारको चाउरीपना र दाग हटाउनका साथै छालाको सुख्खापन हटाउनका लागि बनाइने सौन्दर्य सामग्रीमा चिप्लेकिरा प्रयोग गरिन्छ ।