ब्राजिलले विश्वकप जित्छु भन्न सक्दैन
ब्राजिलका कप्तान थिएगो सिल्भाले विश्वकप फुटबल जित्छु नै भन्ने वाचा गर्न नसक्ने तर आफूहरुले उत्कृष्ट खेल प्रस्तुत गर्ने भने वाचा गर्न सक्ने बताएका छन् ।
फुटबल महारधी दक्षिण अमेरिकी देश ब्राजिलले सन् २०१४ मा घरेलु मैदानमा भएको अघिल्लो विश्वकपमा सेमिफाइनलमा जर्मनीसँग ७–१ को हार बेहोरेको थियो ।
आउँदो जुन १४ देखि रुसमा सुरु हुने विश्वकप फुटबलका लागि आफ्नो देशको टिम अहिले राम्रो रहेको सिल्भाले बताएका छन् । ३३ वर्षका सिल्भाले फ्रेन्च लिग वान क्लब पेरिस सेन्ट–जर्मेन, पिएसजीबाट खेल्छन् ।
उनले भने, ‘हामीले फेरि अर्को विश्वकप खेल्ने अवसर पाएका छौँ र यो हाम्रो इतिहास फेरि लेख्ने अवसर हो । हामी उपाधिका लागि वाचा गर्न सक्दैनौँ तर हरेक खेल उत्कृष्ट बनाउने छौँ त्यो चाहिँ वाचा भयो । विश्वकप फुटबलका बेला तपाईंहरुले उत्कृष्ट फुटबल देख्नुहुनेछ ।’
विश्वकपको तयारी स्वरुप ब्राजिलियन टिमले अहिले लण्डनमा अभ्यास गरिरहेको छ । टिममा चोटबाट मुक्त भएर मैदानमा फर्किने तयारीमा रहेका स्टार स्ट्राइकर नेइमार पनि छन् ।