रवीन्द्रकी श्रीमतीलाई चुनाव लडाउने प्रचण्डको खुलासा

नेपाल कम्युनिष्ट पार्टीका अध्यक्ष पुष्पकमल दाहाल प्रचण्डले दिवंगत नेता रवीन्द्र अधिकारीको क्षेत्रमा उपनिर्वाचन हुँदा उनकी पत्नीलाई उम्मेदवार बनाउने बताएका छन् ।

सोमबार पोखरामा संवाददाताहरूसँग कुरा गर्दै प्रचण्डले अधिकारीको निधनपछि खाली भएको कास्की–२ को सांसदका लागि अधिकारी पत्नी विद्या भट्टराईलाई नेकपाले उम्मेदवार बनाउन सक्ने बताएका हुन् ।

‘वामदेवजीको चर्चा त्यतिकै आयो । त्यो होइन । उहाँले खण्डन गरिसक्नुभयो । पार्टीले जिल्लाको पनि विचार र परिस्थिति हेर्नुपर्ने हुन्छ,’ प्रचण्डले भने, ‘परिवारको सदस्यभित्रबाट जाँदा उहाँको परिवार पनि राजनीतिक परिवार हो । नेतृत्व गर्न सक्ने क्षमता भएको उहाँको जीवन संगिनी पनि हुनुहुन्छ, विद्याजी । यी सबैप्रति विचार गरेर पार्टीले निर्णय गर्छ ।’