कमल थापा भन्छन : बाबुरामजीको उचाई झनै बढेको छ

काठमाडौं- जनता समाजवादी पार्टीका नेता डा. बाबुराम भट्टराईको वरियताको बिषयमा यतिबेला चर्को व्यंग्य चलिरहेको छ । सामाजिक संजालमा त उनलाई धेरैले जनता समाजवादी पार्टीको चौथो वरियतामा पुगेको भन्दै पार्टी छाड्न समेत सुझाव दिएका छन् ।

यस्तैमा राप्रपा अध्यक्ष कमल थापाले भने डा. भट्टराईको वरियता र राजनीतिक उचाई निर्वाचन आयोगमा पेश भएको कागजले नगर्ने बताएका छन् । थापाले ट्वीट गर्दै भट्टराईको लामो राजनीतिक यात्रा/संघर्षले समाजमा स्थान स्थापित भैसकेकाले कागजको वरियताले फरक नपर्ने बताएका छन् ।

जनता समाजवादी पार्टी निर्वाचन आयोगमा दर्ता गर्ने क्रममा डा. भट्टराईको वरियता तल परेको बिषय चर्चामा रहेकै बेला थापाले भने कागजको भन्दा सामाजमा स्थापित वरियता ठुलो भएको बताएका हुन् ।

‘लामो राजनीतिक यात्रा/संघर्षले समाजमा उहाँको स्थान कायम भइसकेको छ। एकता गर्दा नाम तल राख्न मानेर बरु उहाँको उचाई अझै बढेको देखिन्छ’, थापाले ट्विटरमा लेखेका छन्।