आइपिएल यूएइमा: सट्टाबाजी नेपालमा, तीन जना पक्राउ
मोरङ। यूएइमा आयोजना भइरहेको इन्डियन प्रमियर लिग (आइपीएल) क्रिकेट खेलमा अनलाइनमार्फत् सट्टाबाजी खेल खेलाएको आरोपमा ३ जनालाई मङ्गलबार बेलुका प्रहरीले पक्राउ गरेको छ।
पक्राउ पर्नेहरूमा विराटनगर महानगरपालिका-१५ भट्टीमोड बस्ने ३८ वर्षीय मुन्ना भन्ने सत्यजित साह, ३८ वर्षीय बैजनाथ साह र सोही महानगरपलिका-१७ रानी बस्ने ४२ वर्षीय जगदिश साह रहेका छन्।
विशेष सूचनाको आधारमा जिल्ला प्रहरी कार्यालय मोरङबाट खटिएको प्रहरीले सत्यजितलाई मोबाइल फोनबाट आइपीएल खेल हार्ने वा जित्ने भनी अनलाइनमार्फत् सट्टावाजी गरिरहेको अवस्थामा फेला पारी पक्राउ गरेको हो।
घटनाको थप अनुसन्धान गर्ने क्रममा उक्त कार्यमा संलग्न बैजनाथ र जगदिशलाई समेत प्रहरीले पक्राउ गरेको हो। साथै उनीहरूको साथबाट नगद ६० हजार रूपैयाँ, ३ थान मोबाइल, १ थान ल्यापटप र १ थान मोटरसाइकल समेत प्रहरीले बरामद गरेको छ।
पक्राउ व्यक्तिहरू उपर जुवा वा सट्टाबाजी खेल मुद्दाअन्तर्गत थप अनुसन्धान भइरहेको जिल्ला प्रहरी कार्यालय मोरङले जनाएको छ।