बझाङमा पहिरोमा परि एकै परिवारका ३ जना सहित ४ को मृत्यु , २ घाईते

बझाङ । बझाङको खप्तडछान्ना गाँउपालिका वडा नम्बर ६ बयानामा पहिरोमा परी एकै परिवारका तिन जना सहीत चार जनाको घटनास्थलमा नै मृत्यु भएको छ भने २ जना घाईते भएका छन् ।

पहिरोमा परि खप्तड छान्ना गाउँपालिका वडा नम्बर ६ बयानाका ५२ वर्षीया उजलीदेवि थापा, उनकी बुहारी ३२ वर्षीया महेश्वरी थापा र महेश्वरीकी ६ वर्षिय छोरा कृष्ण थापाको घटनास्थल मै ज्यान गएको छ । पहिरोमा परेर सोही गाउँका २० बर्षिया मंगल थापाले पनि ज्यान गुमाएका छन् ।

त्यस्तै पहिरोमा परेर पाँच वर्षका दुई बालक कविराज थापा र रिकेश थापा घाइते भएको घटनास्थलमा रहेका वडासदस्य प्रेमबहादुर थापाले जानकारी दिएका छन् । बयानागाउँ नजीकैको शिव मन्दिर गलेगडा भन्ने ठाउँमा रहेको चौतारामा बसीरहेका र नजिकैको बाटोमा हिँड्दै गरेकाहरुलाई एक्कासी आएको पहिरोले बगाएर पुरेको जिल्ला प्रहरी कार्यालय बझाङले जानकारी दिएको छ ।