आफ्नै गृहजिल्लामा पत्तासाफ भए अर्जुननरसिंह केसी

काठमाडौं । नुवाकोट कांग्रेसमा हैकम जमाउँदै आएका कांग्रेसका प्रभावशाली नेता अर्जुननरसिंह केसीको गृहजिल्ला नुवाकोटमै बेहाल भएको छ । पार्टीको केन्द्रीय राजनीतिमै प्रभाव राख्ने केसी आफ्नै जिल्लामा नराम्रोसँग पछारिएका छन् ।

अर्जुननरसिंह केसीको समूहविरुद्धमा कांग्रेसका रामशरण महत, डा प्रकाशशरण महत र बहादुर तामाङले गठवन्धन बनाएर चुनाव लडेपछि केसी प्यानलको क्षेत्र, जिल्ला सवैतिर बिजोग बनेको छ । तर पनि स्थानीय तहमा भने दुई नगरपालिकासहित ५ स्थानमा केसी प्यानलको अध्यक्ष निर्वाचित भएको छ ।

केन्द्रमा रामशरण महत र अर्जुन नरसिंह केसी एउटै समूहमा भएपनि जिल्लाको हकमा भने रामशरण महतले देउवा पक्षमा रहेका भाइ डा प्रकाशशरण महत र बहादुर तामाङसँग मोर्चावन्दी गरेर केसी समूहविरुद्ध चुनावी प्रतिष्पर्धामा गएको थियो ।

देउवा पक्षमा रहेका भाइ प्रकाशशरण निकटका ध्रुव श्रेष्ठलाई क्षेत्र नम्वर १ र बहादुर तामाङ निकटका जगत तामाङलाई क्षेत्र नम्वर २को क्षेत्रीय सभापति दिएर रामशरण महतले भतिज रमेश महतलाई जिल्ला सभापतिमा उम्मेदवार बनाएका थिए ।

अर्जुननरसिंह केसीले पनि भाइ केदार नरसिंह केसीलाई सभापति उठाएका थिए । अर्जुननरसिंह केसीका भाइ जगदिश नरसिंह केसी दुई कार्यकाल सभापति भएपछि यसपटक विधानले उनलाई चुनाव उठ्न दिने थिएन । सोही कारण केदार नरसिंह केसी चुनावी प्रतिस्पर्धामा थिए ।

प्रदेश र क्षेत्रीय अधिवेशनसम्म केसी समूह भन्दा रामशरण, प्रकाशशरण र बहादुरको समूह झण्डै २ सय मतले अगाडि थियो । तर जिल्ला सभापतिको चुनावमा भने जम्मा १० मतले रमेश महत विजयी भएका हुन् । जिल्ला कार्य समितिमा महतको प्यानललै निर्वाचित भएको छ । महतको ८३३ मत र केसीको ८२३ मत रहेको छ ।

उपसभापतिमा महत प्यानलकै सन्तमान तामाङ राजु थापा बिजयी भएका छन् । तामाङको ८४६ मत र थापाको ७५१ मत रहेको छ । थापाले केसी प्यानलका उपसभापति उपेन्द्र कुइँकेल भन्दा ३ मत बढी ल्याएर निर्वाचित भए । कुइँकेलको ७४८ मत रहेको छ ।

उससभापति पदका अर्का उम्मेदवार होमबहादुर तामाङको मत ६८२ रहेको छ । उनी केसी प्यानलका हुन् । उपसभापति पदका स्वतन्त्र उम्मेदवार ठाकुरजंग पाण्डेले ८७ मत प्राप्त गरेका छन् ।

सचिवमा बैकुण्ठ मिश्र ९ सय मत ल्याएर र श्रीराम श्रेष्ठ ८२९ मत ल्याएर निर्वाचित भएका छन् । सचिव पदमा केसी प्यानलबाट उम्मेदवारी दिएका शिबप्रसाद दाहालको ७०२ मत र शंकर पाण्डेको ६७९ मत रहेको छ ।

सहसचिवमा उत्तम पाठक ८ सय ८८ मतसहित र यादवप्रसाद नेपाल ८ सय २३ मत लिएर निर्वाचित भएका छन् । सहसचिव पदका उम्मेदवारहरु झमकराज गुरुङको ६ सय ८८ मत र रुपबहादुर तामाङ ६ सय ८४ मत आएको छ ।