माओवादीबाट उम्मेदवार सिफारिस, कांग्रेसबाट टिकट

तेह्रथुमबाट प्रतिनिधि सभा सदस्यको निर्वाचनका लागि नेकपा माओवादी केन्द्रबाट प्रत्यक्षतर्फ सिफारिस भएका प्याब्सनका केन्द्रीय अध्यक्ष विजय सम्बाहाम्फेलाई नेपाली कांग्रेसले टिकट दिएको छ ।

पाँच वर्षअघि कांग्रेस छाडेर माओवादी प्रवेश गरी माओवादी केन्द्रको केन्द्रीय सल्लाहकार समेत भएका सम्बाहाम्फे मंगलबार साँझ पुनः कांग्रेसमै फर्किए । सम्बाहाम्फेलाई नेपाली कांग्रेसले तेह्रथुमबाट प्रदेश सभा सदस्य निर्वाचनमा ‘ख’ निर्वाचन क्षेत्रबाट प्रत्यक्षतर्फ उम्मेद्वार बनाएको छ । उहाँलाई कांग्रेसले प्रदेश सभा ‘ख’  निर्वाचन क्षेत्रमा सर्वसम्मत उम्मेदवार बनाइएको जिल्ला सभापति गोविन्द ढुंगानाले बताए ।

बाम–गठबन्धनबाट असन्तुष्ट भएर कांग्रेसमा ‘कम–ब्याक’ भएका सम्बाहाम्फेलाई मंगलबार बालुवाटारमा एक कार्यक्रमका बीच कांग्रेस सभापति शेरबहादुर देउवाले स्वागत गरेका थिए । सम्बाहाम्फे हाल निजी तथा व्यावसायिक विद्यालय अर्गनाइजेसन ९प्याब्सन०को केन्द्रीय अध्यक्ष समेत छन् । उनी प्रदेश सभा सदस्यको टिकट लिएर बुधबारै तेह्रथुम आउँदैछन् ।

तेह्रथुमको फेदाप गाउँपालिका–३, जलजले स्थायी घर भएका सम्बाहाम्फे गृहजिल्लामा माओवादी केन्द्रका प्रभावशाली नेता मानिन्छन् । कांग्रेसमा रहँदा संविधानसभा–१ निर्वाचनमा पार्टीलाई जिताउन महत्वपुर्ण भूमिका खेल्नुभएका सम्बाहाम्फे पार्टी जिल्ला कार्यसमितिको तत्कालिन कोषाध्यक्ष छन् । उनी ०६४ मा भएको संविधान सभा–२ को निर्वाचनको मुखैमा नेकपा माओवादीमा प्रवेश गरेका थिए ।

परिवर्तनको वाहकको रुपमा आफुले लिएको माओवादी पार्टी वाम–गठबन्धन भन्दै नेकपा एमालेसँग घोडा टेक्न गएर धोका दिएको सम्बाहाम्फेले बताए । कांग्रेस कम–ब्याकपछि सम्बाहाम्फेले अब यो देशको विकास र समृद्धि लोकतान्त्रिक शक्तिहरुबाट मात्रै सम्भव रहेको प्रतिक्रिया दिए । सम्बाहाम्फे पुनः कांग्रेसमै फर्किएपछि कांग्रेस कायकर्ता उत्साहित बनेका छन्।