पन्जाबमाथि मुम्बईको रोमान्चक जित
एजेन्सी । घरेलु टोली मुम्बई इन्डियन्सले भारतमा जारी १२ औं संस्करणको इण्डियन प्रिमियर लिग (आईपीएल) क्रिकेटमा रोमान्चक जित निकालेको छ । बुधबार रोमान्चक बनेको खेलमा मुम्बईले किङ्स इलाभेन पन्जाबलाई ३ विकेटले हराएको हो ।
वान्खडे क्रिकेट स्टेडियममा पन्जाबले दिएको १९८ रनको उच्च लक्ष्य मुम्बईले पुरै २० ओभर खेल्दै ७ विकेट गुमाएर पुरा गर्यो । मुम्बईको जितमा केइरन पोलार्डले अर्धशतकीय इनिङ्स खेले । विस्फोटक ब्याटिङ गरेका पोलार्डले ८३ रन बनाए ।
यस अघि टस हारेर पहिले ब्याटिङ गरेको पन्जाबले पुरै २० ओभर खेल्दै ४ विकेट गुमाएर १९७ रन बनाएको थियो । पन्जाबका लागि लोकेश राहुलले शतकीय इनिङ्स खेलेपनि टोलीलाई जित दिलाउन सकेनन् ।
ओपनर राहुलले अविजित रहदै १०० रनको योगदान दिए । यस्तै क्रिस गेलले अर्धशतकीय इनिङ्स खेले । गेल ६३ रनमा आउट भए ।
मुम्बईका हार्दिक पाण्डयाले २ विकेट लिए ।
जितसंगै मुम्बईले ६ खेलबाट ८ अंक जोडेको छ ।
पन्जाबले ७ खेलबाट ८ अंक नै जोडेको छ ।