किन निरिह बने आईजिपी खनाल ?

काठमाडौं । पछिल्लो ३ हप्तामा १५ जना प्रहरी भ्रष्टाचारको अभियोगमा रंगेहात समातिएपछि प्रहरी प्रशासन ठूलो दबावमा परेको छ ।

व्यापारीहरुलाई धम्क्याएर तथा अवैध कारोबारमा साथ दिंदै पैसा कमाउने दाउमा लागेपछि नेपाल प्रहरी विवादित हुँदै गएको हो । त्यसमाथि नेपाल कम्युनिष्ट पार्टी (नेकपा) को भातृ संगठनले आईजिपी हटाउन माग गर्दै गृहमन्त्रीलाई ज्ञापन पत्रनै बुझाएपछि तनावमा रहेका महानिरीक्षक सर्वेन्द्र खनाल आइतबार राष्ट्रिय प्रहरी प्रतिष्ठानमा आयोजित कार्यक्रममा अनैतिक काममा संलग्न प्रहरीलाई कारबाही गर्ने भन्दै कड्किए ।

उक्त कार्यक्रममा बोल्दै खनालले भने, ‘केही प्रहरीको गैरव्यवसायिक कार्यले नेपाल प्रहरीको छविलाई नकारात्मक असर पारेको छ । त्यस्ता प्रहरीले आफ्नो गलत कर्मको मूल्य चुकाउनु पर्छ । ’ उनले दोषी देखिएका प्रहरीलाई विभागिय कारबाही अथवा कानूनी कारबाही नै हुने पनि बताएका छन् ।

खनालले उक्त कार्यक्रममा प्रहरीले जनताको मन जित्ने काम गर्नुपर्ने बताएपनि पछिल्लो ३ हप्तामा १५ प्रहरी अख्तियार दुरुपयोग अनुसन्धान आयोगको फन्दामा परेका छन् । बौद्ध प्रहरीका इन्चार्ज श्याम राई १ लाख ४० हजार घुस सहित पक्राउ गरेको थियो भने त्यसअघि गत भदौ ३१ गते ९ प्रहरीलाई बालुवा व्यापारीसँग घुस लिंदा लिंदै अख्तियारको टोलीले पक्राउ गरेको थियो ।

यसरी पक्राउ पर्नेमा असई गोपाल प्रसाद श्रेष्ठ र सुवास ढुंगाना छन् । त्यस्तैगरी अन्य प्रहरीहरुमा उमेश कुमार यादव, अमन चौधरी, दिपल भारती, मुकेश प्रसाद पटेल, दिपेन्द्र कुँवर, मानसिंह रोका र रत्नप्रसाद रिजाल रहेका छन् । असई श्रेष्ठले ३० हजार घुस लिएका थिए भने ढुंगानाले ४० हजार लिएका थिए । त्यस्तै अन्य प्रहरीहरुले जनही ५ हजार घुस लिएका थिए । प्रहरीको यो टोलीले बालुवा व्यापारीहरुलाई आफुलाई पैसा नदिएमा व्यापार चौपट पारिदिने धम्की दिएका थिए ।

सोही काण्डमा थप दुई जना सइ्र्र ज्योती बिष्ट र गोविन्द खरेल पनि पक्राउ परेका थिए ।

त्यस्तै गत असोज १७ गते सिराहाका प्रहरी जवान नुरुल होडा अन्सारी पनि ३० हजार घुस सहित समातिएका थिए । त्यस्तैगरी गत भदौ २७ गते महोत्तरी स्थित रामगोपालपुरमा कार्यरत सई रामबाबु यादव पनि ५ हजार घुस सहित समातिएका थिए ।

देशमा अपराध बढेको र नेपाल प्रहरीले त्यसलाई नियन्त्रण गर्न पूर्ण रुपमा सफल हुन नसकेको भनि तिब्र आलोचना भइ राख्दा खनालको यस्तो भनाइ आएको छ । खनालले गलत कार्यमा संलग्न प्रहरीलाई कारबाही नगरेसम्म नेपाल प्रहरी बलियो हुन नसक्ने पनि भनेका छन् ।